Jowai : Katkam ka khubor wada yoh na u Superintendent of Excise West Jaiñtia Hills u ma G. Dkhar da ong u wa naki 30 tylli ki dukan dai kiad pharæng (IMFL) hapoh West Jaiñtia Hills da chah khang 25 tylli hadien wa mih ka hukum na ka yung bichaar High Court ka jylla hei yatoh wa ka Meghalaya Excise Act (Assam Excise Act1 of 1910 as adapted by Meghalaya) wa i kydon Rule 183, Sub-Rule (2) yong kani ka aiñ.
Katkam i kyndon kani ka aiñ da phah khang lut ya waroh ki dukan dai kiad nadooh ka 1 tarik u Naitung (April) ya kiwa em harood ki sarokbah National Highway wa kamjooh leh ya kiwa em cha jan ki thaw mane Blai, ki skur wa ki thaw puræ. Lada kwah ki u wai biang hap kyrriah 100 meter na kini ki thaw.
Hei yatoh weini la 17 tylli ki dukan da yoh ki i mynjur na u DC yow wai biang ki ya ki dukan hadien wa da dep wan pait wan sylli ki wakreh ka Excise wei da hun ki wa em ki hei thaw katkam wa kdaw ka aiñ.
Iwa chem chitom kiwa boon u kyrriah thaw khamtam kiwa em harood ka National Highway toh wa pallat na ka sarok toh ka synrang wa u loom næ hap booh cha poh khloo, cha loom wa chawi chawi. Kiwa da kyrriah kam ha Khliehtyrchi da hap kyrriah ki cha i thaw wa em cha tre u loom wei da hap pynlut leh u chna ya ka sarok yow poi cha kani ka dukan. Kamjooh leh ym chah ka aiñ u booh ya ki signboard wa kdaw cha i thaw em i dukan.
Katkam ka yutip wa yoh na u ma Dkhar katkam wa man kattæ kiwa da wai biang toh 3 tylli ha Amlarem Civil Sub-Division, ha Changpung, Nartiang, Kympreng wa kiwi kiwi.
Discussion about this post