Ka National Health Mission, Meghalaya chirup wa ka yung krehkaam District Medical & Health Officer, East Khasi Hills District, Meghalaya ynne da sdang ki ya ka Pneumococcal Conjugate Vaccine (PCV) ha ka yalang wa da pynman ha Pomlum PHC, East Khasi Hills. heiwa u S K Sunn, MLA ka Mawphlang da man u kam u kongsan.
Neiliang u SK Sunn da ong u wa ini i dawai toh ya ki khynboo deiwa kyntu ya ki manbei wymtoh u artatien ki wow yoh myntoi neini.
Da ong u leh wa i PCV daw yarap wow pynduna ya i yap ki khonboo kiwa yoh ya ka kjut Pneumonia.
U Ram Kumar, Mission Director NHM Meghalaya, da ong u wa kani ka programme daw myntoi bha ko wow yarap yada ya i mynsien ki manbei wa ki khonboo hapoh ka jylla heiwa da sdang ya ka Rescue Programme ha ki le bnai wa da dep ha ki 7 na ki 11 District ka jylla heiwa da chem ym em de i khlaad ki manbei iwa man i dak wa bha.
Ye wow kdaw heini wa ka Pneumonia toh iwi na ki daw wa khlaad ki khonboo wa ki khynnah kiwa hadpoh 5 snem i rta. Ka Pneumococcal Conjugate Vaccine (PCV) ye u yoh na ka NHM wei ym emkaam wow su ya i bai dawai. Ya ini i dawai daw e le sien, ka sien wa nyngkong toh manda dap 6 tayaw, ka sien wa 2 manda dap 14 tayaw katwa kawa 3 won 9 bnai. Ini i dawai leh ye u yoh na ki thaw sumaar samen ha i dor wa T. 3000 chisien e.
Kiwi kiwa da klam toh u Dr. R Tariang, DHS (MCH&FW), Dr. D P Syiem, Senior Medical & Health Officer I/c Pomlum PHC, Dr. S Khonglah, District MCH Officer wa Dr. P Manners, State Immunization Officer.
