Kam chibynta wow pynkup burom ya kiwa kreh haphrang namo ki Frontliners, wow pynmiat ya i chait i khiah ki khynnah, ki kynthai wa ki manbei hapoh East Jaiñtia Hills, ka chnat Bhalang namo Social Welfare ka jylla chirup wa ki bor District waka Meghalaya State Rural Livelihood Society, ynne da pynman ko ya ka District Convention of Frontliners ha Madan Khliehriat West heiwa u Montri ka chnat Bhalang, u Kyrmen Shylla da man u kam u kongsan wei da sdang u leh ya ka CM-CAREs (Comfort, Assist, Respect, Empower) Scheme hei emlang u I.W. Ingty, Secretary ka chnat Bhalang, u A. Baranwal, Deputy Commissioner, u D.D. Shira, Director ka chnat wa kiwi kiwi.
U Kyrmen Shylla, da pyntip u wa u Montri Rangbah ka jylla, u Conrad K. Sangma da sdang u ya ka CM-CAREs (Comfort, Assist, Respect, Empowerment) Scheme wow kyrchaan ya ki bru wa da noh i rta, ki manbei wa da dooh ya u kurim wa ki bru wa kyrpang. Da pyntip u leh wa ka sorkar da yaleh ko u pynduna ya i Severe Acute Malnutrition (SAM) wa i Moderate Acute Malnutrition (MAM) namo i duna baam ki khynnah ha ka jylla.
Da pyntip u wa ki sahep na ki chnat i chait i khiah, chnat Bhalang, puræ puthi wa kiwi da ye ki wow yachem 90% ki khynnah wa duna baam (SAM & MAM).
Da ong u wa ha ki snem wa dadep da chah beiñ ka chnat Bhalang khamtam ya u khoo wa da e ko uwa kyrpang tangwa manda poi u ha FCI da rah cha Delhi wow khlæh ki oo wow pynkhlan wow pynmiat wei wow pynpoi biang ya u khoo cha kiwa yoh myntoi. Da ong u leh ya ka yusong wa booh khoo da sylli (Test) katkam wa mang ka sorkar pyrdi.
Da pynche u leh wa uni u khoo boon wa ong ym bang u tangwa uni u khoo man uwa tei uwa man kam i dawai deiwa e nongmuna ya u kew heiwa manda chet ya u kew da ka um ym bang u tangwa manda chet wei dud won da bang u.
Da kyrpaad u ya ki paidbah wow krehlang wa ka chnat khnang wow poi i kaam wa bha wa miat yow man iwa jop.
Heijooh i por da ong u wa ha ki duna san snem kattu, ki khon khynroo ka East Jaiñtia Hills ym em de u sahdien ki, wei i maya ki paidbah ya oo da wan krehlang ki wa oo.
U Kyrmen da ong u leh wa boon wa kular wei boon iwa angnood ki paidbah, tangwa iwa em ka sorkar ye ko wow e cha ki paidbah tangwa iwa ym em won u leh kammon.
Chooh chooh da ong u wa hadooh katni dang boon ki bru kiwa ymtip ya ki laad yarap na ka sorkar wei hapoh ka East Jaiñtia da kreh chitom bha ki, wei hapoh i yahkhmat u Deputy Commissioner da ye u lai kut ki manyung wow pynche hajrong ki laad yarap wa ye ki u yoh na ka sorkar.
Ha kani ka sngi, u G. Nengnong, Consultant, Poshan Abhiyan da pyntip u wa ha u Naikhynde 2020 da pynman ya i sylli ha waroh ka ri wow tip ya i em ka SAM & MAM ha ki khynnah wei ha ka jylla em 16,327 ngut ki khynnah kiwa em MAM wa 1,788 ngut ki khynnah wa em hapoh SAM wei ha u snem 2021 ka jylla da kynjoh ko 95% kiwa da chait.
Kam wow burom yei kreh ki AWW, ki Mini AWW, ki AWW Helper, u Kyrmen Shylla da pynbna u wow pynku noh ya ka nong yong ki heiwa ki AWW da pynku da T. 1500, ki Mini AWW T. 750 katwa ya ki AWW Helper won T. 500 wei ini da krehkaam i nadooh ka 1 Naichiphaw 2022.
Ha kani ka sngi da saam leh ya ki ID Card ka CM-CAREs, ka Best Anganwadi Center cha ka Rymbai Pompyrthad Anganwadi Centre, kamjooh leh ya ki Field Functionaries wa kynthup ya kiwa kreh Anganwadi, Anganwadi Helper wa ki Village Organisation ka District.
Ka Y. Najiar, DPO, ICDS da khana ko ya ki kaamram kiwa kreh Anganwadi, ASHA wa ki SHG hapoh ka MSRLS wow pynduna ya ki khynnah wa em MAM & SAM. Kiwi kiwa da klam ha kani ka sngi toh u A. Baranwal, Deputy Commissioner waka R. Passah, District Social Welfare Officer.
