15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Da sdang ya ka JAC wow dawa pynku kyrdan noh ya ka Padu State Dispensary

Advertisement ad1
Advertisement ad1

Ynne ka 5 tarik ka FKJGP-War Jaiñtia da khut yalang ko ya waroh ki Waheh Chnong wa ki Secretary Chnong na ki 13 tylli ki Chnong kiwa kynthup ya ka Padu Bah, Padu Masku, Padu Mawjyllang, Khonglah, Nongbarehrim, Nongbareh Lyntiar, Ammutong, Mawlong, Pamshadong Shnong, Pamshadong Shmia Shyiang, Mawngap, Amkoi wa ka Kudeng Rim.

Ha kani ka yalang da wan kyrchaan lang ka KSU-War Jaiñtia wa ka HNYF-SRMC. 

I thmu kani ka yalang wa da pynman ha ka Community Hall ka Padu Bah toh hajrong wow pynku kyrdan noh ya ka Padu State Dispensary cha ka Primary Health Centre. 

U Shlur Mukhim, President ka FKJGP-WJC da ong u wa kani ka State  Dispensary kawa da dap da ki sanphaw snem i rta, da chah ieh khonswet da slem bha ha ki bor sorkar.

Ya kani ka yalang, da pynlai da u Reachingson Kongwang uwa man u General Secretary ka FKJGP-WJC wei da thoh ya ka bui da u Recording Secretary, u Stelin Mukhim uwa man leh u Secretary Chnong ka Padu Bah.

U Seilut Pohshna uwa man leh u waheh chnong ka Padu Masku, da kyntu u ya waroh ki waheh chnong wow sai lut yei buit i bor wow kyrchaan ya ini dawa neibynta i myntoi ki paidbah.

U Worning Khonglah, uwa man kam u waheh chnong ka Khongkah, da ong u wa i chait i khiah wa emkaam tam ha kani ka pyrthai wa katni.

Neiliang u Tarzon Lymba, President ka Seng HNYF da e nongmuna u ya ki paidbah kiwa haap hapoh ka Dawki PHC da yoh yarap bha ki heipor wa chitom saje, katwa u Lurman Talang, Secretary ka KSU-WJNC da ong u wa ka seiñ chimkhia ko wow yachem ya u montri ka chnat i chait i khiah hajrong ini ha ki por wa dadep. 

Kiwi kiwa da e yei klam ha kani ka yalang toh u Willson Talang, waheh chnong ka Nongbareh Rim, u Witness Pohtam na Lyntiar wa kiwi kiwi.

Ha kani ka yalang da rai wow sdang noh da ka Joint Action Committee on Demand of Up Gradation of Padu State Dispensary to PHC. 

Kiwa kitkaam kani ka JAC kynthup ki ya u Reachingson Kongwang kam u Chairman wa u Stelin Mukhim kam u Secretary. 

Kiwi tawon wa da chah jied man ki kamni hawah:

U Seilut Pohshna kam u Vice Chairman

U Shlur Mukhim kam u Vice Chairman 

U Worsing Khonglah kam u Asst. Secretary 

U Lurman Talang kam u Joint Secretary 

U Dr. Arwind Khonglah kam u Adviser 

U Witness Pohtam kam u Adviser 

U Tarson Lymba kam u Adviser 

Da kynthup leh ya waroh ki waheh chnong wa ki Secretary chnong wow man kam ki Executive Member.

Share this:
Previous

182 ngut kiwa dang yoh COVID-19 ha Meghalaya, la 9 ngut ha Secretariat wa kawi wa yap ha West Khasi

Next

Da chah wow wai biang ya i dukan Unique