I kylla ka suiñ bneiñ namo ka Climate Change da man ko kawi na ki phang wa da chimkhia ka Rotary Club International, wei ynne ka sngi kam chibynta yong kani ka thong krehkaam, ka Rotary Club of Jowai wa ka Rotary Club Orchid City Shillong da sdang ki ya ka Project Hariyali namo i thung dieñ iwa da yoh yarap na ka Mahindra Finance ha St. Paul Secondary School, Mookaswan.
Ha kani ka sngi da em ka yalang wa da pynlai da u Rtn. SK Lato uwa man u President warim ka Rotary Club ka Jowai heiwa da e u ya ki kyntien waiphang wei da khana u wa i thung dieñ da man i kawi na ki kaam wa da chimkhia bha ka Club heiwa da pynman ko ya i thung dieñ ha Khliehtyrshi, West Jaiñtia Hills wa ha Loom Thang ka Khliehtyrshi kamjooh leh ha Bishop House, Loombihsyntu, Mihmyntdu.
Ha kani ka sngi u Rtn. Vivek Kumar uwa man leh u Project Chairman ka Hariyali Project da ong u wa da chimkhia bha ka Rotary Club of Orchid City Shillong wow pynman ya i thung dieñ ha kylleiñ ka Ri-loom Khasi-Jaiñtia wei da dap u dei sñiawkmen wa da ye wow leh yeini ha kani ka skur ynne ka sngi heiwa da ban joor u wa emkaam bha ym du wow thung ya ki dieñ tangwa wot wow sumaar ya ki neibhah manda heh ki daw yoh myntoi i ym du ka la’ær tangwa wot ki soh leh kamjooh.
Neiliang u Rtn. James M Pohsngap uwa man leh u President warim ka Rotary Club of Jowai da ong u wa i thung ya ki dieñ pyntikna i wow yoh ya ka um neibhah hajan ki dieñ næ ki khloo da chem bait ya ki tyllong um. Da ong u wa hadien manda heh kini ki dieñ ha kani ka skur ki bru daw sñiawsuk ki wow wan chongke ha ini i thaw.
U Rtn. Vincent H. Darlong uwa man leh u Vice Chancellor ka Martin Luther Christian University uwa man leh kam u kongsan ha kani ka sngi da ong u wa i kaamram yong ki bru toh wow pynim biang ya ka rymaw, wei kam kiwa chong chnong ka ri toh i kaamram ki bru wow yada ya ka rymaw wa ki soodong sookun yong ka katkam ki kyndon ha ka Riti Synchaar ka ri.
Da ong u wa ha ka thaaiñ mihsngi, ya ki jaitbru ri-loom man ko iwa kongsan tam wow yada ya ka rymaw ya ki khloo wa kiwi kiwi wei waroh ki niam hikai ki wow yada ya ka rymaw ya iwa da booh da chna da u Blai tangwa katni da hap pynyoo yei emkaam wow yada ya ka rymaw da i thung ya ki tre dieñ deiwa ban leh wa ini ymtoh u kut i du hei thung tangwa emkaam leh wow sumaar ya ki wow pyntikna wa heh ki. Chooh chooh da pyntip u wa katkam wa chem ki bru chemphang ha ka thaaiñ mihsngi, ki bnai wa miat dooh wow thung ya ki dieñ toh ha u Naiynru wa Naiynñiaw heipor wa dang slap khnang wow skem wow heh ki.
Neiliang u A. Khonglah uwa na ka Mahindra Finance, da ong u wa ha kani ka kynti ka yung krehkaam yong oo da krehlang ko wa ka Rotary Club Jowai wa ka Rotary Club of Orchid City Shillong khnang wow ye u sumaar ya ki dieñ wei i daw wa hap krehlang toh wa ka yung krehkaam yong oo ymye ko wow sumaar bait ya ki dieñ tangwa deiwa krehlang chirup wa kiwi ki seiñ daw ye u pyntikna wa ini ym man i iwa sepai.
Ya kani ka sngi da pynkut ya ka yalang da ki kyntien khublei na u Rtn. Anthony War.
