Jowai: U Wailadmiki Shylla, u MLA ka Jowai, ynne ka sngi da sdang u yaka Poshan Maah (The National Nutritional Month) hapoh ka District ha yung walieh ka Tpep Pale wa pynman daka District Programme Officer ICDS Cell, West Jaintia Hills.
Hawa klam ha ini i wai yaka Poshan Maah, u Wailad da ong u wa man ko kawa emkaam bha neibhah man ko neibynta wow pynyoh myntoi ya ki khynnah kynthai, kiwa em nadooh 0-6 snem, ki kynthai wa dang khai kyllood, ki kynhtai wa dang punkhon wa kiwa dang e bu khon yow pyntikna wa baam ki ya ki baam wa chait wa khiah. I thong ka Poshan Maah toh wow pynsñiawthooh paidbah ya ki jait baam wa emkaam cha waroh ki manyung ha kini ki le snem lyngba ki krehlang ki chnat sorkar, ki ASHAs, Anganwadi wa ANM.
Da khut e leh ya waroh kiwa emkti wow ya krehlang yow pyntikna wa waroh u yohmyntoi ki ha kani ka chibnai ka One Month Poshan Maah Mission, da ong u leh wa yow pyntip cha oo wa ha kiwon ki sngi u pynman ya kani ka prokram yow pybna u cha ki chnong yow yoh myntoi kiwa sah cha nongkyndong.
Da kaweh lama u leh yaka lai paidbah wa da chimbynta da ki khynnah skur, ki wakreh Anganwadi, ki wakreh ka ICDS Cell kiwa rah leh ya ki kot rben kiwa em ki ktien wa klam chaphang i baam wa i rukom baam wa bha yow yoh yei chait i khiah.
Yow pynsñiawthooh ya ki khynnah skur wa ki Anganwadi da pynman leh yaka yalang pynsñiawthooh paidbah kawa klam chaphang kiwa emkaam u tip chaphang ka Poshan Maah Mission da u R. Sari, SBP u wa da ong wa ka sorkar da booh thong ko wow pynduna yei wymbiang i heh i san ki khynnah, i duna baam, i duna snam ha ki khynah khian, ki kynthai wa ki kynthai wa dang khai khyllood.
Ka Dr. V.J Laloo klam ko chaphang i emkaam wow baam ya ki baam wa bha wa tei yow lait na i duna snam, da klam leh chaphang i ktah na i chongkha dang khian. U Additional Deputy Commissioner P.K. Borao da wan u kam u Chief Guest hei emlang u Dr. K.C. Ajar, District Medical Health Officer, u W. Marbaning, District Agriculture Officer wa kiwi kiwi.
Discussion about this post