15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1
Advertisement ad1

Da seiñ ya kawi ka Union wow dawa yei hok yong kiwa kreh Muster Roll

0 Comments

Jowai: Ka Dorbar paidbah yong ki Muster Roll kiwa kreh ha ki tnat waphær waphær ka Sorkar jylla ha ri-loom Jaiñtia kawa da pynman ynne ka 17 tarik ha District Auditorium, Mynthong Jowai, heiwa da pynlai da u Titos Shadap, Vice President ha i ya emlang yong ka R. Passah General Secretary, ka L. Kyndiah Treasurer, u Adviser u K.L Pariat wa ki EM ka Seiñ wa ki Muster Roll kiwa wan na ki tnat Sorkar waphær waphær ka ri-loom Jaiñtia.

Ha chwa wa u sdang ya ka dorbar, ka seiñ da pynyoo ko ya i sñiawlem ya i khlaad u tynde u A.B. Vajpayee u Montri Rangbahdooh warim ka Ri India, kamjooh da kynmoo ko ya ki kaam wa khroo wa da seiñ u kam ka SSA ha kawa boon ki khon ki Muster Roll da yoh yarap bha ki na kani ka SSA wa kawi ka bynta kawa thmu u wow pynbiang pyndap ya i yoh ka yong i ki Muster Roll næ kiwa mylla sngi (Unorganised Sector).

Advertisement ad1

Ha kani ka Dorbar da chim ya ka rai wa u kyrpaad ya u Montri wa pait ya ka tnat Labour ka Sorkar jylla Meghalaya, wow hukum ya ki tnat Sorkar ha ri-loom Jaiñtia, yow su noh ki ya ka bai nongsngi kawa T. 189 chi sngi wa ka Arrear yong ki Muster Roll kawa ym em su ka tnat PWD (Roads & Building) la palat san ynru bnai tam kattu kawa da pynku ka Sorkar Meghalaya nadooh u Naitung 2017 la chisnem tam.

Da kyrpaad leh ya u montri wa emburom yow hukum u ya ki tnat Sorkar wow su tikna ki man u bnai ya ka nong sngi ki Muster Roll, watoh ini i pynslem u su ya kani ka nong sngi, ktah joor bha ko ya i puræ ki khonruid, ki khon ki kti, khamtam ya i manbru longbru iwa man ka sngi, iwa rap yoo maa wa daw ktah ko ya i hok manbru longbru yong ki Muster Roll waroh, heiwa da em ki Muster Roll da haap chah pynmih ki na ki yung chongwai neidaw wa slem ware ki u yoh ya ka nong sngi næ hiar i purae ki khon ki yong ki Muster Roll neidaw wym yoh tikna ya ka nongsngi u phah khrehkot ya ki khon ki khon ruit ki yong ki.

Neitæ ka dorbar da rai ko wow kyrchaan ya i thmu ka sorkar Meghalaya wow pynku nongsngi cha ka T.300 chisngi kawa yooluti u krehkam lura noh ko, katkam ka Notification Dated Shillong the 13th June 2018.

Ka Dorbar ka seiñ da rai ko leh wa u dawa na ka sorkar wa pynchongngiah ya kiwa kreh nongsngi hadooh manda dap ki 65 snem, watoh hadooh katni ym tikna ya u snem u chongngiah ki Muster Roll, neitæ wa ka Sorkar u e ko leh ya ka bai baam tymmen hadien wa da chongngiah ki na i kreh Muster Roll.

Katkam ka hukum ka Sorkar Meghalaya Dated 16th Sept 1996 kawa da tip kam ka Meghalaya Regular Casual Workers Scheme 1996. Heiwa da hukum wow wanrah cha katæ ka Regularised Casual Workers (RCW) ya ki Casual namo ki Muster Roll kiwa da kreh palat 10 snem chaneiñ, da rai wa u kyrpaad ya ka sorkar wow pynkrehkam noh ya kani ka hukum khnang wa kitu ki Muster Roll kiwa da heh i rta yow yoh noh ki ya kani ka hok kawa da toh u e ka sorkar ya ki.

Ka Dorbar da sñiawdiaw ko ya ka tnat Labour yong ka West Jaiñtia kawa da thlia boonjait u e ya ki myntoi kiwa toh hok u yoh  ki Muster Roll kiwa man kam ki dkhot la chi snem chaneiñ ha ka MB&OCW Board, iwa da chem wa ki jri rieh slap chisngi u pynemkaam da jæd, ki juti jri kiwa san kilogram chi jur khia ki. E ki da ki Cheque na kani ka tnat krehkam neibynta Scholarship ya ki khon ki Muster Roll da em kiwa haap phet yaamrem na ka State Bank India (SBi) neidaw wym pdiang ka Bank ya kitæ ki Cheque kiwa da e ko heidor T. 5600 wa T. 7000, neibhah ini i leh kani ka tnat hajrong kani ka Cheque pynmih ko chiboon u dak kylli ya ka seiñ, iwa ka seiñ daw booddien bha ko heiyatoh wa ini i lehbeiñ kini ki tnat sorkar ya ki Muster Roll wa ya kiwi tawon kiwa mylla sngi.

Ha kani ka dorbar, da rai wa u e pyrtuid noh da ka “Jaiñtia PWD Muster Roll Workers & Labour Union” heiwa daw pyntipmit ya kani ka seiñ katkam ka aiñ sorkar kamjooh yow yakreh lang ko wa kiwi tawon ki seiñ kiwa yatoh wa i manbha manmiat kiwa kreh Muster Roll wa kiwa kreh mylla sngi ha ri-loom Jaiñtia. Heiyatoh wa ki rai kiwa da chim na kani ka Dorbar neibynta i manbha manmiat ki Muster Roll wa kiwa mylla sngi, ka seiñ da rai ko u pynap cha u Montri ka Tnat Labour ka Sorkar Meghalaya, iwa daw yang chooh ko kattu katni bnai, iwa lada ym pynkrehkaam ka sorkar, ka seiñ u chim ko ya ki laad kiwa rap khor kat hadooh wa u lai ujor cha ka High Court Meghalaya.

Kiwa kitkaam ka seiñ kiwa da jied ha kani ka dorbar neibynta u snem 2018-2021.

President – U Khroo Lamsalanki Pariat

Vice President – (1) U Titos Shadap (2) Ka Dayoo Ïakai.

Genl Secy – Ka Manda Bareh.

Asstt Secy- U Chibor Dkhar.

Treasurer – Ka Lana Kyndiah.

Da jied leh khatsan ngut ki Executive Member na ki tnat waphær waphær ka sorkar Meghalaya.

Kamtæ neiliang ka seiñ kyrpaad joor ko ya u Montri wa pait ya ka tnat Labour ka sorkar Meghalaya wow sñiawbha u wow pynkrehkaam lura ya kitai ki hok ki yong ki Muster Roll næ kiwa mylla sngi katkam wa da hukum hi da ka sorkar jylla Meghalaya hi ha ki snem kiwa da dep.

Da kyrpaad leh ya waroh ki Muster Roll wa kiwi tawon kiwa mylla sngi ha waroh ka ri-loom Jaiñtia wa u wan chaphrang u yakreh lang wa kani ka seiñ neibynta u yaleh u paan lang ya i hok iwa toh hok u yoh.

Previous
Next

0 Comments

Leave a Reply