Hadien wa u MDC ka Liang Pyrchah ka JHADC, u Nehemaia Lamare da wanrah u ya ka phang (Motion) yaklam hapoh ka Dorbar Lyiur wa chi sngi ka Council ha ka 20 tarik uni u bnai wa kammon u pynku wei wow yada yei hok ki paidbah tre ri wa haap hapoh u pood u ang ka Council, deiwa pynsñiaw u leh i sñiawkhia hajrong i chah ktah ki paaid warep wow pynlai yaaw ya ki mar rep, i chah ksih dor ki mar rep wa kiwi won i eh. Neitæ da pynsñiaw u leh hajrong wa kammon u pynku yei kaam uiñke suwari deiwa kyntu ya ka EC u chna ki aiñ neibynta u im ki bru yong i khamtam i kamai ja-kpoh wa man-ka-sngi.
Neiliang u CEM ka JHADC, u Thombor Shiwat hawa yieñ wow pynche ya kani ka Motion ong u lada yaklam hajrong i hok mantre yei khyndaw u chyiap, ki khloo ki kjam, i hok haka riti dustur, ka ktien thylliej, i hok ha ka khayi pateiñ wa i hok haka synchaar khadar, boon ki bynta wa kam ki jaitbru yoh tipmit kyrpang ki deiwa pynkupbor leh u yoh i yada wa kyrpang.
Wei yow pynku ya ka hok ki paaid wa chong chnong ka thaaiñ la heiyatoh ka khyndaw u chyiap, ong u ka sorkar Meghalaya lyngba ka Land Transfer Act 1971 da khang pyrchah ko ya ki baar jylla u thied thaw ha ka jylla yong i, wei ka Council leh lyngba ka aiñ Jaiñtia Hills Autonomous District Management and Control of Land and Assessment and Collection of Revenue yong ka 3rd Regulation Act 1985 da pynskem leh yei hok mantre ki nong Jaiñtia heiyatoh ki thaw ki bhaw i khyndaw u chyiap, wei kam ki sabut cha ki khon ka Council da e ko leh da ki kot ki sla kam ki Land Holding ki Pata næ wow Register hapoh ka chnat Forest neibynta ki thaw yong ki.
Weiwa hapoh kani ka aiñ ym ye leh u pynkylla pyrtuid yei mantre cha ki wym toh ki tre ri.
Heiyatoh wa ki riti dustur, u CEM ong u wa ka EC da tipmit ko ya ki kattu katni ki jait kur wa da wan pyntipmit cha ka Council. Na kini ki jait kur kynthup ki kur tynre (Indigenous Tribe) kiwa e jait cha ka bei, wa kattu katni won leh ki kur wa da sah slem ki ha Ri Jaiñtia ki wym toh ki Indigenous Tribe.
Wei yeini da dep e kti ka EC cha ka Expert Committee neibynta u pyndep chna noh ya ka Clan Bill.
Heiyatoh wow pynkhlan wei pynrkhiñ yei bor synchaar ha ki chnong ki Elaka yow duna i wan tooid ki bar jylla, da pyntip u wa ka EC da em ko leh ya ka Select Committee wow pait yeini.
Neitæ yow pynku yei khayi pateiñ won ong u ka Council lyngba i yarap ka sorkar jylla da sakhi wa ka Iawmusiang Complex wa sahteiñ daki phaw snem su pyndep hi kattu, najrong wa ka EC em ko leh i kyrmen u yoh ki Scheme wa rap heh neibynta u pynku kyrdan ya ar tylli ki yaaw wa kynthup ha Wahiajer wa ha Khliehriat, heiwa dadep yasoi soskular leh ka Council wa ka sorkar jylla neibynta u e poisa ko yow chna ya kini ki yaaw.
Heiyatoh won wa i tyrwa ki Liang Pyrchah wow em da ka yqaw dailang, pyntip u wa ka yaaw dailang wa chna da ka chnat Agriculture ha 7 Mer kawa pynkrehkam ka sorkar heipor Covid, kamwa man kattæ dang yaklam ka Council wa ka sorkar jylla yow pait u pynlai noh da ka Council neibynta i myntoi ki paaid warep ka thaaiñ.
Deiwa yooluti leh yow ye u khanglaad yei wan khih ki baar jylla wa i chah ksih dor ki mar rep, wei ya ki mar wa na baar leh u booh dor da i hi.
Kiwi won ki MDC Liang Pyrchah wa chimbynta yatai ya kani ka mat kynthup u Rikut Pareiñ wa ka Deiwipaya Tongper.
Discussion about this post