Ka Bethany Hospital da pyntip ki wa heiyatoh wa mih khubor wa em uwi na ki Doctor yong ki wa yoh u ya u COVID-19. Da ong wa uni u Doctor toh uwa ym em wan kreh palat chi tayaw hadooh ynne ka sngi wei katkam ki kyndon, kiwon kiwon ki Doctor kamjooh kiwi ki wakreh chwa wow sdang kreh biang ki hap wow Test ki ya u COVID-19.
Ya uni u Doctor da chim yaka nongmuna (Sample) yong oo haka 29-07-20 wei ka Report da pynyoo wa man Positive u iwa mut wa da yoh u ya uni u khñiang wei da lithooh ya oo na yung wa sah u yow li booh cha ka Corona Care Centre yow leh u yaka Quarantine.
Katkam wa phah daka sorkar, da Test biang ya uni u Doctor haka 30-07-20 wei heini da chem wa da man Negative u iwa mut wa da lait u na uni u khñiang.
Da ong wa neidaw wa uni u khñiang toh uwa dang thymme wei boon toh iwa ym pu tip bha chaphang uni u khñiang, ye hi wow chait du hadien chi sngi leh. Ka Hospital da pyntip ko leh wa uni u Doctor man u uwa khlan wei ym em chitom u.
Kamtæ da kyntu yaki paidbah wa ym toh wow khuslai ki wei yaka Hospital ym em khang yaka. Ka OPD man ko kawa dang wai hi wei kamjooh leh ya waroh ki krehkaam ka Hospital wei da bood leh ya waroh ki kyndon hawa wan kiwa phah sumaar kamjooh leh kiwa wan pait bru deiwa bood leh yaka Social Distancing, i deiñ yaki Mask, wa kiwi ki tiar yada, kamjooh i pynkhooid yaki tiar ki tar kamjooh i soodong kani ka Hospital.
Da pyntip leh wa ya ki wakreh, da Test man ki por yow lait ki wow man kiwa rah ya u khñiang wei ym em wa da yoh ya uni u khñiang hadien wa Test yaki, deiwa lai chakhmat da ka rukom im wa thymme.
