Da toh u hiar chuki noh u CEM ka JHADC khnang wow im ka Council: Nehemayah Tyngkan

Neiliang ka chnat khynroo ka seiñ Congress hapoh jylla kawa tip leh kam ka Meghalaya Pradesh Youth Congress (MPYC) ynne ka miet da pynsñiaw ko yei mynsien wa sñiawkhia hajrong i dooh tulop ki wakreh ka Jaintia Hills Autonomous District Council kattu la 7 bnai.

Neiliang u Vice President ka MPYC, u Nehemayah Tyngkan da ong u wa i pyndooh tulop ya ki wakreh ka Council kawa man ka stieh wow yada ya ka jaitbru man i iwa ymye u pdiang, neibhah wa ki kreh ki kam ki chrot yong kani ka stieh.

Ka MPYC da ong ko wa ki wakreh ka Council da chem chitom bha ki katni hajrong wym yoh tulop, tangwa ya ki khon ki kti u pynbiang ya i baam i dih u pyndap ya ki hap chim da ka ram.

Da ong ko leh wa lada kiwa khih mylla sngi leh chimkhia ka sorkar wow su nongsngi ya ki khnang wow lait ki nei yap thngan, iyi won iwa eh ya ka JHADC wow pynbiang ya ka tulop ki wakreh yong ka.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

Da pynkynmoo u leh wa ha kini ki bnai wa dadep neiliang u CEM ka Council, u Thombor Shiwat da kular u wa lada ymye wow su tulop ya ki wakreh wot oo leh u hiar u na ka chuki (kam u CEM) wei ini pynyoo i wa u Thombor ymye u wow kit ya ka lyngkor neibynta ka Council kawa kreh neibynta wow yada ya ka jaitbru.

U Nehemayah da ong u leh wa wot hadien wa da mih ki kyntien kular u CEM (Thombor Shiwat) wow hiar chuki lada ymye u su ya ka tulop ki wakreh; tangwa katni won yoodur lakam wa da mylliñ u yeini iwa da kular u.

“Ye u wow e daw wa i daw wa slem u yoh tulop ki wakreh toh neidaw kani ka Lockdown”, da ong u Nehemayah, deiwa pynrap leh wa “Ini pynyoo i yei wymye u Thombor wow ksoh ya kani ka chuki kam u CEM”.

U Nehemayah da ong u leh wa lada u CEM ka KHADC ye u wow pynbiang ya ka tulop ki wakreh ka Council, ileh won u CEM ka JHADC rem u heini wei pynjoor u du wow khlai ya ki kyntien kular donhi.

“Lada u CEM ka JHADC toh u dap chynrang, da toh u hiar chuki noh u myntu khnang wow im ka Council kawa yada ya ki paidbah ka ri-loom Jaiñtia,” da dawa u Nehemayah.

Chwa wow pynkut neiliang u Nehemayah da ong u wa ka lada kwah ka Council, kam heini i por ye ko wow paan yarap na ka sorkar jylla neibhah wa katkam wa man hi neiliang ka sorkar pyrdi da ebor ko ya ki sorkar jylla wow pynemkaam ya ka song poisa wa em ha ka SDRF wow pyndap yei emkaam ka jylla wei lada man ka sorkar jylla kawa chimkhia yeini, ki wakreh hi ka JHADC ymtoh u dooh tulop ki.