U Montri Rangbah ka jylla uwa man leh u National President ka National People’s Party (NPP), u Conrad K Sangma da pynsñiaw u yei pyrchah wa joor ya ka aiñ Armed Forces Special Powers Act (AFSPA), deiwa ong wa heithaw wa kani ka aiñ u yada wei wow wanrah ko yei suk ya ki paidbah ka thaaiñ Mihsngi tangwa da man pathan ko mar dei kangtleiñ.
Da ong u wa ka NPP daw thoh ko cha ka sorkar India wow pyndam (Repeal) ko ya kani ka aiñ neibhah wa da pyrchah ka Party ya kani ka aiñ da slem bha nadooh i por u (L) P.A. Sangma.
Ya ini waroh da ong u Conrad hadien wa jia i chah siat yap ki 13 ngut ki bru paidbah ha ki chipai ha Mon District ka jylla Nagaland ha kani ka 4 tarik.
Chooh chooh da ong u wa da toh u ngam yillu hajrong ki kaam wa ktah ya ka thaaiñ mihsngi wei wow pynyaar noh yei thij i pyrkhat neibhah wa ka AFSPA da wanrah ya ka dei thmu wow pynbait ya ki kaam ha ka thaaiñ tangwa ini da man pathan iwa bakla.
Chooh chooh da ong u wa emkaam wow wanrah ya ki kaam pynroi, ki kaam wa yatoh wa ki khynroo khyllood wa kiwi kiwi hapoh ka thaaiñ mihsngi waroh kawi.
U Conrad da ong u leh wa hadien ini i jia ha Nagaland da pynkynmoo wei da pynkhyrngiat i ya waroh wa ka AFSPA ymye ko u e yei jubab heiwa ym du yakhun ko ya ki bru kieñ suloi tangwa da wanrah ko leh ya i dooh ya kiwa boon tylli ki mynsien wa kordor.
Heijooh i por da ong u wa wa em boon ki kaam wa toh u yaklam heiyatoh wa ka thaaiñ mihsngi ka ri India tangwa kani ka aiñ (AFSPA) ymye hiwot ko wow man katæ ka luti.
