Ynne ka sngi da leh warom ya ka World Food Day namo ka sngi yong ki mar baam hajrong ka phang, ‘Our actions are our future, Better Production, Better Nutrition, Better Environment Better Life’ wei ya ka yalang da pynman ha Shangpung Moolibang, West Jaiñtia Hills. Ya kani ka lehwarom da pynman da ka yung krehkaam u District Agriculture Officer, West Jaiñtia Hills.
Ha kani ka sngi u Waheh Chnong ka Shangpung Moosyiem, u Richard Langbang da man u kam u kongsan hei emlang ka R. Lamare Agriculture Development Officer, Laskein Block waka Rida W. Rangad, Horticulture Development Officer, Laskein Block.
Ya ka yalang da pynlai wei da yoh ya ki kyntien waiphang na u D. Pyrbot uwa man kam u District Agriculture Officer, West Jaiñtia Hills.
Neiliang u Pyrbot da ong u wa ya kani ka sngi da lehwarom neibynta ki warep wei da khana u kajiak hajrong kani ka sngi.
Da pyntip u wa ha ka 16 Naichiphaw 1979 da sdang ya ka Food And Agriculture Organisation (FAO), wei ya kani ka sngi da pynman noh ya ka kam ka World Food Day. Da ong u wa emkaam wow pynchlur ya ki warep wow pynboon ya ki mar baam khamtam ya ki mar baam kiwa tei ya i doh i pran yong ki bru.
U Dr. D. Paswet, Senior Scientist & Head KVK, Jaiñtia Hills hawa e i klam da ong u wa hanla boon ki warep dang boon ki mar rep kiwa wan na baar.
Da ong u wa ki mar baam ha i tlang syad bha ki, neibhah mar dep ah kba da neh chrah i thaw katwa cha kiwi ki thaw da rep salan da ki mar rep ki wow mih hei tlang wei da e nongmuna u wa kam ha ki chnong Nongkrem katni da sdang ki wow tih wow thung jhoor wei hei tlang da dai ki ya ki jhoor cha kiwi ki thaw khamtam cha Ri-loom Jaiñtia.
Da ban joor u leh wa ymtoh u pynemkaam ware ya u sapdok neibhah wa daw ktah ki ya ka rymaw wa ya ki bru wa baam ya oo katwa kamtæ wow syndong hawa pynemkaam ya ki dawai.
Ka Rida W. Rangad da e ko i klam hajrong ka phang yong kani ka sngi heiwa da ong ko wa emkaam wow pynboon ya ki mar rep neibhah wa neh i thaw rep kamjooh wei da toh u rep ya ki jhoor hei tlang.
Da e nongmuna ko leh wow thung ya ki jhoor mar-khap wa kiwi ki mar rep kam ki toh wei hei tlang ye u thung da u kubi, ha i tlang ye leh u thung ya u toh harood u kubi.
U Richard Langbang hawa e yei klam kam u kongsan da ong u wa kani ka sngi man ko kawa emkaam bha neibynta ki warep. Da ong u wa i baam ym toh u sepai ki wei emkaam wow ye ki wow pyndap yeiwa emkaam uwi pa kawi ki bru.
Da ong u wa hawa rep emkaam u rep ym du neibynta wow baam tangwa wot wow ye u dai leh ya ki mar rep.
Ha kani ka sngi da yoh i klam na uwa mihkhmat yong ka yung krehkaam ka ATMA wa naka J. Suchiang kawa man ka warep, wei da pynkut ya ka yalang da ki kyntien khublei na u LJ Niang, SDAO Amlarem.