15 1 0 4000 1 https://wyrta.com 300 0
theme-sticky-logo-alt
theme-logo-alt
Advertisement ad1

Da u khoo e yarap ka Dorbar Chnong Tympang ya ki Asha

Ka Dorbar Chnong Tympang Iawmusiang, Jowai ynne ka sngi da kdaar ko ki laad yarap yong ka cha ki Asha deiwa e sñiawbha da u khoo chi churia wei ini i yarap yong ki toh chibynta i tipmit yei kaam yong ki Asha wa man ki kiwa yakhun wa hakhmat yong ka khlam COVID-19.

Ya ini i e yarap da leh haka yalang wa pynlai da u Wompher Nartiang ha Yung Hall ka Dorbar Chnong chirup i emlang ki dkhot chnong nadooh u waheh chnong u Eddy Shylla, Asst. waheh chnong u Latu Nartiang, u Secretary E. Lywait, Asst. Secretary u Daowan Nartiang wa kiwi.

Ki Asha wa da yoh yarap ha kani ka sngi toh kiwa pait wa yoo ha ki bynta waphær waphær ka chnong Jowai wei waroh em ki 32 ngut.

Kawi napyrdi ki Asha wa da e yei klam pynsñiaw ko i sñiawngooh wa khroo yaka chnong Tympang neibhah wa kani toh ka sien nyngkong dooh wow yoh pdiang ki yei yarap, wa waroh chi kattu wym jooh em kiwon kiwon leh kiwa kyruiñ khmat cha ki, najrong i su wa khian leh chlur bait ki u kreh yei kaam wada bynta hanla hapyrdi i wan ban kani ka khlam COVID-19.

Neiliang u waheh chnong ka Tympang hawa e yei klam ong u wa neiliang ka chnong leh chim ko ya kani ka bynta neibhah wa datip kam ki Asha yoh ki yei su wa khian. Ya kam kani ka laad yarap kwah hi ki wow e yarap ya i kiwi won ki manyung wa dooh wa chem yei eh tangwa wym ye ki neibhah wa sñiawthooh ki wa boon i lut.

Heiyatoh wa ini da kyntu u leh yaki kynhun waphær waphær wow kyruiñ khmat e yarap sñiawbha cha ki Asha kiwa man kiwa yarap wow pynbiang yei emkaam yong ki manyung wa chah kthah ha kani ka khlam. Da kyrpaad haroh u wa ya kitu kiwa da yoh wym toh won u myllin ki wow booh i duwai kyrpang neibynta yong ki Asha khnang yow ye ki u e i chakri wa rap bha yaka ri ka jaitbru.

Heijooh i por kyntu haroh u ya ki bor sorkar wow yoo wyrai ya ki Asha deiwa pynbiang leh ya ka tulop wa sahteiñ yong ki na uwi u bnai hadien uwi won khnang yow ye ki u kyrchaan yei emkaam yong ka yung.

Share this:
Previous

Yoh yarap ki manyung ka Sohkymphor da u khoo wa u dai na ka Ramakrishna Mission

Next

Sñiawngooh ka Dong Moolari Jalyiah Chirup waka Seiñ Raij Shnong Khliehmyntriang yei yarap ka Ramakrishna Mission