Hadien wa mih i ood i khñium na ki paidbah ka Jowai hajrong i sih u sarok ha kylleiñ ka chnong Jowai, da mih leh i yooluti wa i kyrmen na ki wow chna pynmiat (Repair) ya ki bynta wa da sih bha u.
Hajrong ini i angnood wei kyrmen da yoh u yaklam wa u Executive Engineer ka PWD Jowai South Division, u B. Niangti uwa da pynche wa katkam wa man kattæ hanla em chiboon ki bynta u sarok wa da sih da jæd, tangwa ympu chna ya oo.
Da pyntip u wa ya i chna pynmiat ya ki sarok ha Jowai da leh hadooh ynnin snem wei ki bynta wym em u yoh u chna toh ha u sarok Dulong College Road wa u sarok Thomas Jones.
Da pynrap u leh deiwa ong wa neini ha u Khonchonglad (November) 2020 daw sdang kreh ya u sarok ha Jowai uwa haap hapoh ka Smat City (Smart Town) ka sorkar pyrdi heiwa daw siang ya oo da ka Bituminous Concrete.
Da ong u wa uni u sarok wa daw siang daw rben u 60 mm wei u yarngkat u wa ki sarokbah (National Highway).
Heiyatoh wa i lut wow siang ya uni u sarok da ong u wa da mang wow pynlut hadooh T. 12 klur wei i kreh u man i ha ki bnai kreh namo Working Months nadooh u Khonchonglad hadooh u Wisu (March).
