Ka Umbather Water Harvesting Scheme, Rngad, East Jaiñtia Hills District da wai ya ka ynne ka sngi da ka B. Rani, Addl. Deputy Commissioner hei emlang u R.R. Lyngskor, Executive Engineer, Water Resource Department, u D.B. Dhar, Assistant Director Agro (ADA), ka B. Milliemngap, I/c District Agriculture Officer wa u Waheh Chnong ka Rngad, u D. Lamo.
Ka B. Rani, kam ka kongsan ha kani ka sngi da yaroh ko ya ka Water Resource Department wa ka yung krehkaam District Agriculture Officer, kamjooh u waheh chnong wa da ye ki wow pyndep ya ini i kreh deiwa ong wa i pynlang ya ka um man i kyrkhu wa khroo ya ki paidbah deiwa kyntu ya ki paidbah wow pynneh ya kani ka thaw.
Da ong ko wa i rep man i u budloom yong ka khayi pateiñ iwa pyndap baam ya ki paidbah wei ka sorkar da pynkreh ko ya kiwa boon ki Scheme ki wow myntoi ki paidbah wei ki paidbah leh emkaam ki wow pynneh wei wow sumaar ya ki.
U R.R. Lyngskor da pyntip u wa ya kani ini da kreh hapoh ka Pradhan Mantri Kisan Sinchayee Yojana (PMKSY)-Per Drop More Crop (PDMC) wei man ko kawa nyngkong hapoh ka jylla. Da ong u wa kani ka Water Harvesting Scheme da yoh poisa na ka sorkar pyrdi wa ka sorkar jylla ha u snem 2018-2019 wei da pyndep ya ka ha u 2021 ha i lut wa T. 22.697 lak ha i thaw wa heh 11.50 Hectare i wow myntoi ya 7 tylli ki manyung ka chnong.
Chooh chooh da ban joor u yei emkaam wow pynneh ya ka um wa ki tyllong um ha ka chnong deiwa kyntu wow pynneh ya ka um hapoh khyndaw deiwa thung dieñ, wow tih ya ki dooid (Trenches) heiwa ka um slap u ngam ko khnang wow pynneh ya ka um hapoh khyndaw.
U D.B. Dhar, da ong u wa na kani ka thaw daw myntoi ki paidbah wei daw pynchlur ko ya i kaam rep hapoh ka chnong deiwa pynrap wa emkaam leh wow thung ya ki dieñ wei wow yada na i iñ ki khloo neibhah ini daw ktah wei daw pynduna i ya ki mar rep kamjooh leh daw pynjoor i yei tlor i khyndaw.
Da pynchlur u leh ya ki warep wow pynemkaam ki ya ki thaw rep waroh chi snem khnang wow neh i man sboh i khyndaw wei ini daw yarap i wow rap pynboon ya ka lap wa yoh ki. Da pynkynmoo u leh ya ki warep wa chwa wow rep ki emkaam wow lai ki cha yung krehkaam ka Agriculture hapoh ka District wow rap tip ya ki jhoor wow rep lada man ki kiwa miat ha i thaw wa i khyndaw wei kammon ki jait jhoor wa i sboh wow pynekaam.
Ha kani ka sngi da ekti leh ya ka Water Harvesting Scheme cha ka Water Users Association ka chnong Rngad.
Kiwi kiwa da klam ha kani ka sngi toh ka B. Mylliemngap, u Ripos Lyngdoh, Secretary, Rngad katwa ka M. War, ADO, Lumshnong da e ko ya ki kynthein khublei.
