Jowai: Ka 5 tarik uni u bnai da man ko ka sngi wow sah kynmoo ya ka thaaiñ yong ka Elaka Shiliangmyntang wa da em ko yaka Training Center neibynta wow pynbniah ya ka sap yalehke Football.
Ya kani ka rai wow booh ya kam kani ka Center da chim da ka Chaphrang Iong I Sports Club Barato, deiwa ya krehlang wa ka Northeast Indian Goal (NEIG), wei ya kani ka Center da wai paidbah ha ka 5 tarik uni u bnai, ha madan Football yong ka Chaphrang Iong I Sports Club Barato, ha ka chnong Barato.
Ha kani ka sngi da emlang u MDC ka 12-Barato Mukroh Constituency u A. Shadap, u waheh chnong ka Barato kam uwa e buit yong ka Club, u CEO yong ka NEIG u Ajoymeson Lyngdoh deilang wa u COO ka NEIG u M.R. Pyrtuh, ki waheh chnong wa ki bru mihkhmat yong ka thaaiñ hi waroh kawi.
Hawa e yei klam neiliang yong ka NEIG u M.R. Pyrtuh kam u COO da batai wei da pynche u ya ki paidbah chaphang ka NEIG, wa da seiñ ya ka ha u snem 2018, wei da khlieh yaka da u Kyrmen Shylla, u montri ka sorkar jylla, da em ko ka thong wow pynku yaka yalehke Football ha waroh kawi ka thaaiñ Northeast khamtam dooh ya ka jylla Meghalaya yong i, neibynta wow e sikai ya ki khynnah nadooh 7 snem hadooh 16 snem i rta. U A. Lyngdoh kam u CEO yong ka NEIG won da batai u ya i krehkaam yong ka Northeast Indian Goal, yeiwa ka da ye ko wow wai ya ki Center ha kiwi ki thaw deiwa ya krehlang wa ki seiñ waphær waphær wei dang em ki ka thong wow wai ha waroh kawi ka Northeast, khaddooh da kyrpaad u ya kiwa chong chnong wow ya krehlang wa kani ka Club wow pynlai wei wow pait ya kani ka Center khnang u nang ku ko chakhmat.
U A. Shadap, MDC kam u kongsan ha kani ka sngi, da yaroh u ya kani ka kaam wa da chimkhia da ka Club wow thooh laad pynyoh ya ki bru maya Football yong ka thaaiñ ya kam kani ka Center kawa emkaam bha wow kyntu ya ka sap yong ki khynnah ha ka liang ka Football. Da sñiawngooh u leh ya ka NEIG wa ka da wan yarap ko ya ka thaaiñ yong i wow pyndap pynbiang ko ya i emkaam yong kani ka Center, khaddooh da kyntu ya ki bei ki pa yong ki khynnah wa ym toh u khanglaad ya ki khon yong ki wow wan chah sikai ha kani ka Center neibhah ka pyrthai katni lyngba ka Football man ko kawi na ki laad wow yoh kaam yoh jam ki khon yong ki mynstep mankawi, wei da kyntu u leh ya kiwa yahkhmat ka Club leh wow kreh chitom wow pynku ya kani ka Center wow e chakri kawa hok cha kiwa wan wow chah sikai ha kani ka Center.
Da yoh ya ki kyntien kyrkhu kyrdoh na u waheh chnong Barato uwa man leh kam u Adviser yong ka Club, wei da yoh leh ya i batai wa i thmu yong ka Club hawa i booh ya kani ka Football Training Center da u Sarlangki Dkhar uwa man u Secretary yong kani ka Center. Ya kani ka yalang da pynlai da u Lucky Lamare u Chairman yong ka Club.
Da pynphooh pynphieñ ya kani ka yalang da ka yalehke Football yong ki khynnah skur nadooh ki 7-10 snem wa 12-16 snem na kylleiñ ki skur kiwa em hapoh yong ka Elaka Shiliangmyntang.
Discussion about this post