Ynne ka sngi da wai pyrda yei e sikai soor wei chna syntu neibynta kiwa em i duna ha i doh i pran (People With Disabilities) kawa da pynman da ka Seiñ Kynjoh Chaphrang Ki Kynthai Kyndongtuber, West Jaintia Hills District ha Vocational Training Center yong ka seiñ.
Kani ka e sikai toh kawa kyrchaan poisa da ka Meghalaya State Skill Development Society (MSSDS) wei da wan wai ya ka da u BDO ka Laskein Block, u Bari Niang kam u kongsan hei ya emlang ki dkhot chnong, ki dkhot ka seiñ wa kiwa chah sikai kiwa wan na chnong Kyndongtuber, Pammanik wa na Mynso.
Ya ka yalang wa tbian da pynlai da u Waheh Chnong ka Kyndongtuber, u Shiwa Siangshai. Kiwa klam toh ka Selmim Lyngdoh, Secretary ka seiñ, u Lambormi Suchen, Skill Development Officer ka MSSDS, u Rilinius War, Secretary VEC wa u Dasumar Shylla, Secretary Chnong.
Neiliang u BDO hawa e yei klam chwa wow ah Ribbon da pynsñiaw u yei kmen wa ka MSSDS deilang wa ka Seiñ Kynthai da ye ki u pynman kam kani ka e sikai wa kyrpang wa kawa nyngkong dooh ha ka Block wa ka District neibynta ki bru wa chna kyrpang u Blai.
Da sneiñ u leh ya waroh 30 ngut kiwa chah sikai wow man kiwa minot wei wow wan tikna cha kani ka e sikai. Da yooluti u wa hadien wa da kut ini i e sikai, waroh toh u ye ki u seiñ kaam dei yong ki hi yow im jakpoh katkam i sikai wa da yoh ki.
Ka MSSDS da pynyoh ko i myntoi ya ki khynroo khyllood wa ki wym em khih deiwa e boonjait ki e sikai yow yoh u seiñ khih.
Neiliang u Waheh Chnong da e u yei sñiawngooh ya ka MSSDS wa ka Seiñ Kynjoh Chaphrang kiwa da kreh bha heiyatoh wow e sikai cha kiwa chong chnong.
