Ka Sahlyngkhot Lyngdoh Lumputhoi Memorial Knock-Out Football Tournament, 13th Prize Money 2022 kawa pynman da ka Lumputhoi Sport Club da pyndep ya ki yakhun Semifinal.
Ha ka Semifinal wa nongkong wa da pynman ha ka 19 tarik uni u bnai hapyrdi ka Moolamanoh Pyrdi Shnong SC pyrchah ya ka Rangad Shiliangloom SC, ka Moolamanoh Pyrdi Shnong SC da jop ko 2-0. Ka Semifinal wa ar ynne ka sngi hapyrdi ka Moonongtdu SC pyrchah ya ka Rangad SC, ka Moonongtdu SC da jop ko 2-0.
Kamtæ ka Moolamanoh Pyrdi Shnong SC wa ka Moonongtdu SC daw yakhun Final ki ha ka 24 tarik uni u bnai heipor 1:00 waje i sngi kawa man leh ka sngi pynhaap pyrda yong kani ka Tournament. Ha katai ka sngi daw wan u Kyrmen Shylla, MLA ka thaaiñ kam u kongsan. Kamtæ ka Lumputhoi Sport Club da khut wer ko ya phi ki parachong parathaw najan najngai wow sñiawbha phi u wan pynchongchit lang khnang yow man ko ka sngi wa phooh wa phieñ.
Da pyntip leh chaphi ki paralok parajor heiyatoh wa katu ka Lucky Draw wada booh tarik wow pynkhle ha ka 22-10-2022 neidaw wym ye u kiar da pynkylla tarik noh ya ka cha ka 24-10-2022. Kamtæ kyrpaad ya phi ki paralok wada thied Ticket wym hoi u sñiawphær phi wei lyngba kani ka yutip yow lait phi nei sñiawthooh bakla.
