U Chief Minister ka jylla, u Conrad K Sangma ynne da wai u ya ka yung krehkaam ka District School Education Office deilang ka Multilevel Car Park wa em ha Mawkhar wa kawi won ka Fully Mechanised Multilevel Car Park wa em ha Motphran deiwa emlang u Deputy Chief Minister, u Sniawbhalang Dhar.
Kini ki ar tylli ki thaw booh kari toh kiwa da pynchna hapoh ka Shillong Smart City Mission kiwa da chna hei lut wa ₹38.92 klur yow pynkyllooid ya ka Shillong kiwa ye wow pynyieñ 200 tylli ki kari ha kini ki ar thaw.
U Conrad hawa e yei klam da ong u wa i khynnia kari toh iwa ood da kiwa wan uiñke suwari kamjooh kiwa chong chnong wei da pyrchang wow pynkylla ya ki luti syngkieñ deiwa booh ki One Way, ki No Parking wa kiwi de tangwa ym ye wow pynkyllooid.
Kamtæ ka sorkar da pynlut por ko palat chi snem tam deiwa pynemkaam da ki Drone wa ki Satellite Image kamjooh wow kheiñ hadooh katwon tylli ki kari wa lai wa wan wei da chem wa lada kwah wow khang ya ki bru wow pynsangeh kari ki kat hawa em i thaw daw hap e thaw ya ki da kiwi won ki thaw pynyieñ kari.
Deiwa chem yeini ka sorkar da pynemkaam ko da i thaw yong ki bru samen wa ki yong chnong yow chna ya kini ki thaw booh kari heiwa nyngkong da chna ya kawa em hajan ka Additional Secretariat wei kattu da wai sa kini kiwa em ha Mawkhar wa Motphran.
Da khana u wa hawa yoo u Union Minister for Road Transport and Highways, u Nitin Gadkari ya ka thaw pynyieñ kari ha Additional Secretariat, da pynman ya oo wow kylli kammon da chna yeini deiwa pynpyrkhat ya oo wow booh kam kini ki jooh ha waroh ki thaw wa man loom ka ri.
Hapoh ka State’s Parking Policy, ka sorkar u yarap ko hadooh Rs. 1 lak ya kiwon kiwon ki bru paidbah næ ki chnong kiwa bien u e thaw yow chna thaw booh kari heiwa ka sorkar daw chim ko cha ka kajiak donhi ka bhah na ka bai pynyieñ kari heiwa daw mantre wei u pynlai da ki tre thaw hi wow chim bai kari iwa daw yarap leh yow pynmih poisa ya ka chnong kamjooh wow pynyoh kreh.
Discussion about this post