Jowai: Yow pynyajan wei wow lumlang ya waroh ki Kur Dkhar kiwa em hapoh Jaiñtia Hills (East wa West Jaiñtia Hills District) wei wow ya tipmit iwi ya iwi, ka Seiñ Kur Dkhar West Jaiñtia Hills, da wai wei da pynskem ko sa kawi ka chnat krehkaam yong ka chnong Nartiang ynnin ka 7 tarik kawa tip kam ka “Seiñ Kur Dkhar, Nartiang Unit” heiwa da pynkhamti ya kani ka Unit thymme da ki rangbah yong ka Seiñ Kur Dkhar Jaintia Hills Central Body.
Da pyllai ya kani ka yalang da u President yong ka Seiñ Kur Dkhar West Jaiñtia Hills District u Harwis C. Dkhar wei da yoh ya i klam pdiang na ka Nartiang Unit na u Ridon Dkhar wa ya ki kyntien sneiñ kyntien kroo na ki rangbah yong ka kur kiwa da e na u Rolinson Dkhar, (SKD-EJHD), u Mondaystar Dkhar (SKD-EJHD), u Kermi Dkhar (SKD-WJHD) wa u Shotis Dkhar (SKD-Nartiang Unit).
Kiwa klam da kyntu ki ya waroh ki dkhot yong ka Kur Dkhar ha Nartiang wow man ki kiwa ya maya, yatylli, kiwa chitrhem ha ki kaam wa bha yong ka Seiñ Kur deiwa kamai ya ka hok ka sot, wow man kiwa tipbru tipblai wa kiwa tipkur tipkha la ha ka lai ka yieñ, ha ka imlang sahlang, ha ka kamai ka kajih wa ha ka synchaar ka khadar.
Ya kiwa kitkaam wa ki Executive Members yong kani ka Unit wa thymme da pynkhamti deiwa puræ yaka smai yong ka Seiñ Kur Dkhar wa ya ka Lama yong ka Seiñ Kur, ki muhhor wa kiwi kiwi da e kti ha u Donkhian Dkhar Secretary ka Nartiang Unit da u Medister Dkhar, General Secretay SKD WJHD.
Ha kani ka yalang da ya chimbynta leh da ki rangbah yong ka Seiñ Kur Dkhar na Pasyih, Moodymmai Unit wa na ki chnong wa marjan. Ya ka yalang da pynwai da ki kyntien e khublei na u Donkhian Dkhar, Secy. Nartiang Unit.
Discussion about this post