Jowai : Ynne ka 10 tarik man ko ka sngi wow sah kynmoo ya ki khon ka Dorbar Chnong Loomkyrwiang neidaw wa da wai paidbah ya ka Yungwalieh wa paka ka chnong kawa da chna hei lut kamwa T. 57 lak.
Ha kani ka sngi u Dy. Chief Minister ka jylla u Dr. RC Laloo da man u kam u kongsan katwa u MLA ka ka Shillong South u Sainbor Shullai da man u kam u symbood kongsan.
Ha kani ka yalang wai paidbah ya ka da pyllai da u Waheh Chnong ka chnong u Hamewan Laloo, uwa da khana leh ya ka parom tbian chaphang ka Yungwalieh wa ka chnong.
Ya kani ka yung da chna nyngkong da i yung tin nadooh ka 15 Thohlakhmi (Febuary) 1920, heiwa da noh kylloid mynsien da ka poisa, ki tiar ki tar yow yoh u pynyieñ ya kani ka yung.
Da ong wa kani ka chnong toh kawa nyngkong dooh wow pynman ya ka lehkmen Baamphalar ha Jowai, i pynyoo phlim baiskoop, wa kiwi kiwi.
Da yoh yei klam na ka manbei ka D. Laloo iwa pynbood ya i klam na Secretary ka Building Committee u Chibor Najiar, da ong u wa boonsien ya ka yung warim duk u chna pynmiat bait ya ka tangwa da sdang chna ya ka kajiak chisien.
U FM Dopth, IG (Prison) da ong u wa yooluti u wa na i em kani ka Yungwalieh ki khynroo khyllood kani ka chnong u ku ki liang wanang nadooh ki kaam sports hadooh ki kaam puræ puthi.
Neiliang u AA Shullai, Dy. CEM ka JHADC da ong u wa kani toh ka sngi wow sahkynmoo ya ki khon kani ka chnong wa da yoh ya kani ka yungwalieh kawa thymme kawa chkeh.
Kam u symbood kongsan u Sanbor Shullai, MLA Shillong South da kyntu u ya ki khynroo khyllood wow maya wei wow yada ki ya kani ka Yungwalieh ka wa man ka yung kawa emkaam ha kani ka juk wa ya kawa mynried mankawi.
U Deputy Chief Minister ka jylla u Dr. RC. Laloo hei klam kam u kongsan da yooluti u wa kani ka Yungwalieh ymtoh u pynemkaam du hei wow chna rot næ heipor Baamphalar tangwa emkaam u pynemkaam ki ya ka ha kiwa boon ki liang kam ki kaam yalehke sports.
“Ha ki lympung yalehke wa boonjait ha sor Shillong ym ye ki u kynjoh bor kam ki khynroo kiwa na Jowai neibhah ha Jowai em kam kini ki yung kiwa kyrpang kiwa ki khynroo yoh ki u pynemkaam man ka sngi” da ong u Dr. RC Laloo.
Ha kani ka sngi heiwa kut da yoh ya ki kyntien e khublei na u L. Laloo, General Secretary ka chnong, da yoh leh ya i ngooh blai na u khon ka chnong u Soolangki D. Laloo.
Da pynphooh leh ya ka yalang da ki rwai na ki khynroo khyllood ka chnong.
Ya kani ka yung da chna hei lut kamwa T. 57,06,953. Ya ka poisa da yoh na u MP ka Shillong u PR Kyndiah kamwa T. 3 Lak ha u snem 2001, u Moonlight Pariat T. 3 lak, na ka tnat Sports & Youth Affairs kamwa T. 18 Lak, ki MLA ka Jowai u Dr. RC Laloo T. 7.9 lak, u Singh Mulieh kamwa T. 1.8 lak na u AA Shullai T. 1 Lak katwa na ki paidbah won T. 7,16,953.
Discussion about this post