Ka chlem e sikai tem, sikai put, sikai rwai wa thymme ha Jowai wa tip kam ka By and By Music Academy wa em mar pyrchah ka Jowai Public School, Mooralong da wai ya ka ha ka 31-03-25, kawa seiñ da u Da-oo Biang Langshiang.
Ya ka yalang wai ya kani ka Music Academy wa wan wow sakhi da kiwa ha-yung ha-sem, ki lok ki jor heiwa u Tbn. Lyngkitbait Lyngdoh da man u kam u kongsan uwa da ki kyntien hachwa u wai deiwa ong wa ka rwai ka put ka tem nyngkong hi yarap ko yei jabieñ wei yei bor pyrkhat yong u bru, khamtam ha ki khynnah yarap bha ko ha ka ‘Cognitive Skills’ yong ki kammon ye ki u pyrkhat, u kynmoo yeiwa da chah sikai ki kamjooh wow jop yei eh wa maad ki.
Da ong u wa kat dang heh ki khynnah, kattæ dang roi dang heh i bor pyrkhat yong ki leh. Kamtæ deiwa rwai wei deiwa tem ya ki tiar tem waphær waphær yarap ko wow pynwandur ha i rukom iwa bha yei bor pyrkhat ki khynnah hawa heh wa san ki.
Da ong u leh wa i rwai, i tem, i put ktah ko yei sñiaw yong u bru nadooh i bor pyrkhat wa i kynja mynsien. Ktah wei ktik ko yeiwa pyrkhat u bru hadooh wow pynyaam wei pynkmen ya u bru. Da ong chooh chooh u wa i rwai, i put, i tem hi pynjan ko leh ya ki bru ha ka imlang sahlang, wei ktah ko leh yei mynsien yong u bru. Kawa ye wow pynkylla ya u bru neiwa sih cheiwa bha.
Iwa khaddooh won ong u wa i rwai, i put, i tem yarap ko ya i wow tip i chaphang ka tynre ka dustur yong i wei kamjooh leh wow tip ya ki tynre yong kiwi tawon ki bru ha kylleiñ ka pyrthai. Da ong u leh wa lynbga i rwai, tip i ya ki parom yongrim wei yei long i man nachwa iwa pynyajan ya i wa kitai ki por wa da lai chadien.
Kamtæ da e u yei kyrkhu kyrdoh ya u tre kani ka Music Academy wei ya ki khynnah wa lai puræ ha ka khnang wow nang lai nang ku ko chaphrang.
Kani ka Music Academy toh kawa e sikai nadooh ka Western Music Theory (Staff Notation), Staff to Tonic Solfa Transcription, Guitar, Traditional Instruments, Keyboard, Drums wa ka Vocals. Wei ya ka Admission u sdang wow wai nadooh uni u bnai April wei ye phi leh wow Phone ha uni u Number-8974724782.
Neiliang yong u tre kani ka Music Academy, da pynsñiaw u wa kani ka Music Academy wai ko ya ka dwar neibynta ya waroh ki bru kiwa ka-it yei rwai yei tem nadooh ki khynnah, ki khynroo wa ki waheh. Neibhah wa uni u tre yong kani ka Academy pynsñiaw u deiwa ong u wa “It is never too late to chase your passion”.
Discussion about this post