Ka KINIHO Eri-Silk Meghalaya Brand wa pynmih ya ki that Ryndia that tynre wa boonjait na Umdem Ri-Bhoi District kawa da seiñ da sdang da ka Iba Mallai ha u snem 2016 hajrong ka thong u pynneh pynsah ya ka dustur thaiñ that tynre deiwa pynyahaap wa i rukom chna pynwandur wa ka juk katni, ha ka 4 tarik uni u bnai da ye ko u wai dukan sa ha Jowai hadien 8 snem wa dadep wai ko ha Shillong.
Kani ka KINIHO em ko ha Ladthadlaboh, Jowai mar pyrchah ka madan dai masi ha chrooh ka Federal Bank wa ka Paila Beauty wei da wan wow wai ka da u Frederick Roy Kharkongor, IAS, Principal Secretary ka sorkar kylla kam u kongsan, hei emlang ka Baiantimon Blah, ADC, West Jaiñtia Hills District najrong kiwi wa chah khut sñiawbha.
Ha ka yalang wa pynlai da ka G. Majaw, da pynkup burom leh ya ka Ribis Malai neibhah kani ka manbei em ko ka bynta wa khroo nadooh wow chet ya ki rong yow pynphooh pynphieñ ya ki that, wow sikai thaiñ, wow pynwandur ya ki that wa kiwi de ki bynta ha Umden Diwon Ri-Bhoi.
U Frederick Roy Kharkongor hawa klam pynsñiaw u i kmen wow yoh u emlang ha kani ka sngi wai ya ka chnat KINIHO ha Jowai.
Yaroh u leh yei lai luti ka Iba Mallai heiwa na Umden Diwon Ri-Bhoi poi ko ha Shillong wei kattæ won ha Jowai kawa man ka dwar yong ka Ri-loom Jaiñtia, deiwa yooluti u leh wa kani ka dukan u nang ye chooh ko u khriñ ya ki paidbah wei ye leh u wanrah ki buit thymme kamjooh heiyatoh waka yaaw ka haat.
Ong u leh wa hadien i lai puræ thooh stat ko cha baar jylla da wan biang ko cha chnong deiwa chim ka laad u pynpliah yei sap heiyatoh wa i yoh pateiñ tynre, wei ngait u leh i ye ko u ku neipor cheipor toh lyngba i eh wa hap maad heiwa sdang i lai luti.
Chwa u 2016 ong u ka Meghalaya Textile ym pu em ware bna naam ko, sñiaw du hei khana parom donhi, tangwa man i lai luti wa sñiawsuk heiwa ka rynsan pynmih ya ki that Ryndia that tynre da nangphooh nangkrai ko, wei ha uni u snem leh da boon ki dukan wa wai neibynta u dai kam kini ki jait that.
Ong u wa neiliang ka Meghalaya Textile leh man ko kawa smat u e i kyrchaan wei yakrehlang heiyatoh wa ini.
Yaroh u leh ya ka Iba Mallai wa u Daniel Syiem wa man ki kiwa hakhmat u rah yei naam ka Meghalaya Textile cha baar jylla.
Neitæ sñiawkmen u leh wa ka Meghalaya Textile suki suki yoh ko i tipmit, heiwa wot u Prime Minister ka ri leh ha i klam yong oo ynnin u snem ha ka Mann Ki Baat da klam u ya kini ki that khamtam hadien wa da yoh ya ka chap wa kyrpang næ GI Tag.
Neiliang ka ADC won ong ko man iwa yoosuk u yoo neipor cheipor wa da ye u chna pynwandur ki that thymme katkam wa yah ka juk. Yooluti ko wa i wai ya kani ka dukan leh u ye wanrah ki buit thymme ym du heiyatoh i riam yong Khasi tangwa yong Pnar kamjooh.
Neiliang ka Iba Mallai pyntip ko wa i pyrtuid KINIHO toh i kyntien Bhoi, wei nadooh wa sdang ya kani ka Brand da em ka Production Unit yong ki hi hei wow pynmih ki that Ryndia deiwa pna thaaiñ wei deiwa pna pynmih ki kse kamjooh leh i rong wa pna chet hi.
Ong ko kani ka KINIHO ym du wa man ka dukan tangwa chibynta leh ye ki bru u wan sakhi yei mahajon i tynre yong i hajrong kammon u pynneh pynsah yei riti dustur wa yatoh wa i thaiñ that.
Ha kani ka dukan ye ki paidbah u yoh nadooh ki that sem Pnar, ki that Shawl, ki Muffler ki Scarf, ki Jacket, ki sulapoh kynthai wa chynrang wa pna soor pna thaiñ hi.
La jia wym yoh won ki bru yeiwa kwah ki heipor wa wan mih ye ki u Order yeitæ i Design wa kwah ki deiwa pait na ki Catalogue wa da pynkreh.
Discussion about this post