Ka Community Institute of Technology (CIT) Amlarem Center ynne ka sngi da yoh ko wow wai ya ka e sikai namo ka Skill Training yong ka Skills Meghalaya ha Amlatdoh, Amlarem deiwa emlang ka Yvette Risa Mawlong, MCS kawa man kam ka Sub Divisional Officer (SDO), Civil, Amlarem Sub Division kam ka kongsan deiwa emlang u Lambormi Suchen uwa man leh u Skill Development Officer (SDO) yong ka Meghalaya State Skill Development Society, ki waheh chnong na ki chnong ka thaaiñ Amlarem wa kamjooh kiwi kiwi won ki bru waheh na ka thaaiñ War Jaiñtia, ki khynnah skur wa kiwa chah sikai ka CIT, Amlarem Center.
Ya ka yalang da pynlai da u Dr. S. Waanbah uwa man leh kam u Chairman ka CIT, wei da yoh i klam na ki bru waheh wa kiwa paaw khmat yong ka thaaiñ katwa u K. Pohlong, Waheh Chnong ka Amlarem wa kamjooh na u HB Lanong uwa man leh u bru paaw khmat uwa man leh kam u Ex-Assistant Registrar, Cooperative Department, Shillong.
Neiliang ka kongsan ha kani ka sngi da kyntu ko ya ki khynnah khynroo wow wan chakhmat khnang wow ye u pynbiang ya idæ ha ki jait kaam waphær waphær khamtam wow pynpliah ya idæ ha ki Skill Training khamtam katni ki por duna kreh wow chim kabu ya kini ki jait e sikai yow yoh myntoi yow ye ki u kyrchaan ya idæ wei wow seiñ khih neibhah ini daw yarap ko wow pynmih kamai ya ki yow ye u kyrchaan ya ki yung ki sem hadien habood.
Kani ka Skill Training wa da wanrah hapoh kani ka thaaiñ Amlarem Sub-Division da ka Community Institute of Technology (CIT) Amlatdoh Amlarem Center toh wow e sikai u soor that neibynta ki kynthai wei kani ka e sikai soor toh ka sien wa nyngkong wa em kam kani ka jait Training Center wa kawa e Skill Training ha kani ka thaaiñ deiwa kyrchaan lang ka sorkar Meghalaya.
Ka CIT ha kani ka bhah wa nyngkong da jied ko 20 ngut ki khynnah kynthai neibynta wow pynpliah u soor that (Self Employed Tailoring) wei kini ki 20 ngut daw yoh sikai ki ym du wow soor that tangwa ki e sikai Soft Skill wa Basic Computer heijooh i por.
