Jowai: U montri ka sorkar jylla wa pait ya ka chnat Commerce & Industries, C&RD Block, Soil & Water Conservation, u Sñiawbhalang Dhar, ynne ka sngi da wai paidbah u ya ka chlem hikai yalehke Football wa tip kam ka Football Academy Of Meghalaya ha ka yalang wa da pynman ha Khimusniang Indoor Sport Hall, Jowai.
Ya kani ka chlem da pynlai da ka Northeast Indian Goal (NEIG) hapoh i yahkhmat u Director yong ka, u Kyrmen Shylla uwa man leh u montri ka sorkar jylla uwa pait ya ka chnat Disaster, Social Welfare.
Ka NEIG daw jied ko ya ki khynnah ha man ki jylla ka thaaiñ mihsngi tangwa kyrpang dooh toh na Meghalaya wei daw sdang chwa ko na Ri-loom Jaiñtia, kamtæ nadooh ka tayaw wow wan daw sdang noh ya ka Trial namo wow jied ya ki khynnah na Ri-loom Jaiñtia wei ki khynnah ha u snem wow wan daw yoh yalehke ki ha ka jooh ka rynsaan kamwa yalehke ka Shillong Lajong wa ka Langsning.
Lyngba kani ka chlem daw hikai ya ki khynnah nadooh i rta wa 9 hadooh 15 snem wei kamwa 40 ngut ki khynnah ye ki wow psiah ha ka chi snem.
Da kyntu ya ki paidbah ki manbei manpa wow kyrchaan wei ya ki khynnah kiwa em sap wow wan yachem wa kiwa pynlai.
Kam u kongsan, u Sñiawbhalang da ong u wa nachwa i chimbynta ha ka Sport toh du neibynta wow yoh yei chait i khiah tangwa kamwa man katni hajrong wa yoh yei doh i pran wa chait da man ko leh kam ka karkhana e khih e kreh ya kiwa em sap.
Da ong u leh wa ha ki kajiak snem lyngba i em ka jylla ya ki kattu katni ki khloor yalehke, ka ri India leh da tipmit ko ya ka jylla heiyatoh wa ki kaam Sports, wei i em kani ka thaw daw man ko ka laad ka kabu ya kiwa em sap deiwa kyrmen leh wa kani ka chlem daw ku ko sam chaphrang.
Kiwi won kiwa da klam ha kani ka sngi kynthup ki ya u Kyrmen Shylla, Director ka NEIG, u MLA ka 2-Jowai Constituency, u Wailadmiki Shylla, u M. Shylla Principal ka KJP Synod Mihngi HSS Jowai, u R. Uriah Principal ka North Liberty HSS Jowai, u T. Bamon waheh chnong ka Khimmusniang wa kiwi kiwi.
Discussion about this post