Ka Pana-I-Ka Homestay da wai ya ka ha ka 28 tarik uni u bnai da u Lasky Rymbai, Deputy Chief Executive Member yong ka JHADC kam u kongsan, wei kani ka Homestay da man ko kawa nyngkong dooh ka Dong Moopynien, Wapung Skur, East Jaiñtia Hills District.
Ka symbood kongsan ha kani ka sngi toh ka J. Kharpuri, ADC, East Jaiñtia Hills District, deiwa emlang leh u G.S. Pala, Functionary Officer yong ka Industries Department, East Jaiñtia Hills, u waheh chnong ka Wapung Skur, u P. Dkhar, u T. War, District Soil Conservation Officer, West Jaiñtia Hills District, u S. Manner, OC ka Jowai PS, u Arwotki Shullai wa kiwi kiwi ki waheh wasian wa kynthup ya ki manbei na ka chnong Wapung Skur wa nawi.
U kongsan hawa e yei klam da ong u wa deiwa em kani ka Homestay deiwa e yarap da ka Tourism Department wa ka Industries Department daw khriñ chooh chooh ko yei wan kiwa uiñke suwari kamjooh kiwa lai emkaam leh cha East Jaiñtia Hills District.
Chooh chooh da ong u wa i em kani ka Homestay daw wanrah ko leh yei naam, u pynku ko leh yei yoh i kot yong ka chnong wei wow e kaam e jaam leh ya ki bru na ka chnong. Kamtæ da kyrpaad u ya waroh kiwa chong chnong wow man ki kiwa ksoh ya ka burom ka akor ka wow tyrchaain cha kiwi ki bru kiwa wan na lait leh. Da kyrkhu kyrdoh, kitbok kitrwiang u leh ya ka tre yong ka Homestay yow nang ku ko chakhmat ha kiwa boon ki kaam kamjooh wow yoh nong ko wei yow ye ko leh wow e kreh cha kiwa chong chnong.
Neiliang ka symbood kongsan da ong ko wa sñiawsuk u tip u yoo wa em kam kani ka tre yong ka Homestay, ka khon kynthai yong ka chnong Wapung Skur kawa wanrah ya kani ka Homestay kawa nyngkong ha ka chong Wapung Skur, kawa wanrah leh heijooh i por yei kaam wa bha, i kaam pynroi ha ka chnong. Da ong ko leh wa jooh pynchlur ko ya ki kynthai ki manbei wow wan chakhmat ha kiwa boon ki bynta ki kaam pynroi wa kiwi de, wei ha kani ka sngi da pynyoo sakhiat da ka manbei kawa man leh ka tre yong kani ka Homestay.
Neiliang u Functionary Officer yong ka Industries Department da ong u wym poi pyrkhat u wa ka tre yong kani ka Homestay u ye ko u pyndep smat ya kani ka thaw sah ya kiwa wan-ke. Da e u leh i yaroh ya ka tre wa man sakhiat ko kawa stat, kawa kreh chitom, kawi na ki khon ka chnong Wapung Skur kawa da bna pyrtuid bha ha kiwa boon ki kaam ha East Jaiñtia Hills District.
Da ong u leh wa oo leh yoo hi u yei bha wei stat ko, iwa pynman ya oo wow e smat yei yarap ya ka. Wei ini da man ko ka nuksa wa bha kamjooh leh kawa wanrah ya ka burom ka chnong lyngba kani ka Homestay wa kiwi wa kynthup ya ka Wapung Farmers Producers Company Limited.
Da kyrkhu u ya ka tre ka Homestay, yow lai ko chakhmat hei yoh i kot wei kamjooh hei wow e kaam e jaam ya ki khon ka chnong.
Da yoh leh yei klam na u P. Dkhar wa u S. Manner.
Discussion about this post