Jowai: Ka 9 tarik uni u bnai u man ko ka sngi wow sahkynmoo ya ki khon ka Seiñraij Shangpung heiwa iwa da thmu wei wa angnood ka Seiñ nadooh nachwa da man ko iwa sakhiat katni heiwa u D. Langstang, Executive Engineer ka P.W.D (North Division Jowai) da man u kam u kongsan wow wai ya ka luti lai kjat (Footpath) hapoh ka Tpep Booh Chyieñ kawa yoosuk yoo chongkhia.
Ha kani ka sngi da emlang ka A. Sumer, AEE, PWD (Roads), Shangpung Sub-Division, Shangpung kam ka symbood kongsan, U C. Langbang (Acting Doloi Elaka Shangpung), ki Waheh Chnong wa ki Secretary na waroh ki Dorbar Chnong ha Shangpung, ki waheh ka Khad-Ar Nor, ki waheh wasian yong ka Seiñ Raij Shangpung kamjooh wa ki khon yong ka Raij Shangpung.
U D. Langstang hei klam kam u kongsan da pynkynmoo u ya ki por wa nachwa hawa ha Shangpung dang em du ki Niamtre donhi kiwa man tre ha Shangpung Pohshnong heiwa waroh ki Bei-Men, Bei-Li, ki Pa-Men Pa-Li, ki Ma ki Woh, ki Wa-Rim ki Wa-Jah yong ki kiwa da baam kwai ha dwar u Blai wa yei chyieñ i chrooh yong ki da booh, da lum, hapoh kani ka Tpep.
Da kyntu u leh ya ka Seiñ Raij kamjooh ya waroh kiwa chong chnong yong ka Shangpung Pyllun wow sñiawbha ki u man kiwa lehkhooid ya kani ka thaw wa kyntang khnang wa kani ka thaw u man ko ka thaw uiñ suwari wei wow man ko leh ka nongmuna ya kiwi tawon ki chnong wa em ki khon ka Niamtre.
Neiliang yong ka Seiñ Raij Shangpung da pynsñiaw ko yei sñiawngooh wa khroo ya ki Khon ka Seiñ kamjooh ya ki waheh wasian na Shangpung Mission wa ka Shangpung Koira yei yakrehlang ki wa ka Sein Raij Shangpung neibynta wow pynkhooid pynjngiar ya kani ka thaw kam ka dak wow pynyoo yei yatylli yong ki.
Discussion about this post