Jowai: Ynne ka sngi da man ko ka sngi wow sahkynmoo ya ka Ri-loom Jaiñtia waroh kawi wei khamtam ya ka chnong Sabahmuswang, West Jaiñtia Hills heiwa da wai ya ka Hospital wa kyrpang namo Multispecialty Hospital hapoh ka chnong ya kawa da tip kam ka Woodland WK Hospital.
Ya kani ka thaw sumaar da wan wai da u Montri ka chnat i chait i khiah ka jylla, u AL Hek kam u kongsan ha ka yalang wa da pynman ha kani ka thaw sumaar hei emlang u MLA ka thaaiñ, u Wailadmiki Shylla kam u symbood kongsan, ki heh ka chnat i chait i khiah kam u DHS(MI), Dr. A War wa kiwi kiwi.
Neiliang u Managing Director kani ka thaw sumaar, u Dr. WR Kharshiing, da pyntip u wa kani ka thaw sumaar man ko kam ka chnat ka Woodland Hospital Shillong, wei kani kawa da wai ynne toh da e pyrtuid ‘Woodland WK Hospital” heiwa ki dak WK mut i pyrtuid yong oo yow ye u pynyapher hapyrdi kawa em ha Shillong wa ha Ri-loom Jaiñtia.
Chooh chooh da pyntip u wa kani ka thaw sumaar em ko 108 tylli ki pyllong wei da pynksan u leh kawa ye u e sumaar ya kiwa boonjait ki chitom.
Da pyntip u leh wa man ko kawa nyngkong dooh hapoh jylla kawa em ya ka Effluent Treatment Plant (ETP) wa ka Sewage Treatment Plant (STP) namo ki thaw wow pynkhooid yei jakhlia wa mih na kani ka thaw sumaar, deiwa pynrap leh wa ya ka um wa mih na ki daw ye u pynemkaam biang ya ka (Reuse) kam ha ki paikhana wa kiwi kiwi.
Chooh chooh da ong u leh wa kani ka thaw sumaar man ko leh kawi na ki thaw wa nyngkong dooh hapoh jylla kawa em ya ka Oxygen Generator namo ka karkhana wow pynmih ya ka la’ær Oxygen, wei khamtam kam ha kini ki por wa em ka khlam COVID-19 daw ye bha wow pyndap yei emkaam la’ær Oxygen ki thaw sumaar neibhah wa katkam wa man katni da hap wanrah ya ki tadong Oxygen na Silchar wa Guwahati.
Ya kani ka thaw sumaar da sdang wow chna ha u Duyatra (January) 2017 wei da thmu wow pyndep ha u Wisu-Naitung (March-April) yong uni u snem tangwa neidaw wa em ka khlam COVID-19 da chimpor noh wow pyndep ya ka.
Neiliang u Dr. Kharshiing da pyntip u leh chirup wa i ekhublei ya ka Memjulet Passah kawa man ka Contractor kawa da chimkti yei kreh ya kani ka thaw chirup wa ki khon yong ka, wei neiliang ka Memjulet da lai pait ko yei kreh ha kani ka thaw man ka sngi khlem sangeh wot hapyrdi i rta wa da heh.
Hawa e yei klam ha kani ka sngi kam u symbood kongsa, u Wailadmiki Shylla da ekhublei u ya u Dr. Kharshiing wa da ye u wow wanrah ya kani ka Hospital heini neibhah wa daw yarap bha ko ya ki bru na Ri-loom Jaiîtia ha kiwa boon ki liang, nadooh i por, i lut poisa, wa kiwi kiwi khamtam leh wa daw ye ko wow e khih e kreh ya ki bru na kani ka thaaiñ.
U AL Hek, da ong u wa ini i wanrah ya kani ka thaw sumaar ha kani ka thaaiñ ym mut i du neibynta yong oo samen wa ka yung yong u Dr. Kharshiing tangwa neibynta i myntoi ki paidbah ka Ri-Loom Jaiñtia hi waroh kawi.
U Hek da kyntu u leh wa emkaam wow em i mynsien wow yarap kamjooh leh i chakri wa salonsar ya ki bru wa wan na ki manyung wa ha rukom.
Kiwi won kiwa da e i klam ha kani ka sngi toh u u MDC ka Jowai North u Brightstar Chyrmang, u DHS Dr. Aman War, u DC ka West Jaiñtia Hills District Garod LNS Dykes, Dolloi ka Elaka Jowai Puramon Kynjing wa u Telmi Phawa waheh chnong Sabah Muswang.
