Ka nan wa da chna hajrong ka yurim u pynneh pynsah yaka um, wow psan dakha, kamjooh leh yow khriñ ya kiwa uiñke suwari pyngngaad dei wow pynman yaka kam ka Tourist Spot kawa em ha chnong Sahsniang, West Jaiñtia Hills District da wai paidbah ya ka ynne ka sngi da u Deputy Commissioner ka West Jaiñtia Hilla, u B.S. Sohliya hei emlang u P.K. Boro, ADC West Jaiñtia Hills, ki sahep ka Laskeiñ C&RD Block wa kiwi.
Ya kani ka nan da pynkreh lyngba ka Scheme MGNREGA hapoh ka Laskeiñ C&RD Block nadooh u snem 2017 wei i lut da khynjooh ko chaka T. 1 klur tam wa kynthup nadooh ka bai nongsngi kiwa kreh wei bai tiar.
U Rangdamon Dkhar, Block Technical Assistant ka Laskeiñ C&RD Block hawa pynche hajrong kani ka ka kreh, da pynsñiaw u yei sarong neibhah kani toh kawa nyngkong i kreh wa heh dooh nadooh i krai kamjooh ka mang poisa hapoh ka Laskeiñ C&RD Block wei man ko leh kawa jop hanla hap lai luti ya boon i eh i khoo haki snem chadien.
Ong u hanla i pynlut man kawa heh leh tangwa i yoh myntoi ki paidbah ka chnong won u neh ko pateiñ la pateiñ.
Neiliang u Waheh Chnong warim u D. Ymbon khana u wa hapyrdi i thooh laad ka chnong u pynmih poisa neibynta u yoh su tulop ya kiwa sikai ka skur Kymprup Higher Secondary wa pait wa pynlai da ka chnong, poi pyrkhat noh ki u chna da kani ka nan ka wow man kam ka Tourist Spot, wei i mih neiwa wan uiñke pyngngaad ki bru, neitæ neiwa chong lieñ wa kamjooh leh neiwa dai yaki dakha wa psan ha kani ka nan u yoh ki wow su tulop ya kiwa sikai.
Heijooh i por yooluti u wa neini chaphrang ka chnong u yoh myntoi ko hanla dang em boon kiwi won ki bynta wa dang emkaam u pynkreh ha kani ka thaw.
U Deputy Commissioner hawa e yei klam da yaroh u ya ki bor chong wa da pyrchang ki u leh iwa bha tam wei kyntu haroh u wow em ki i yakrehlang nei por chei por khnang wa kani ka nan u pynmyntoi ko ya ki pateiñ wow wan ym u neh ko du hei khana parom.
Heijooh i por kular haroh u wow yaklam wa ka chnat Tourism neibynta u pynku wei pynyoosuk chooh chooh ya kani ka thaw.
Kiwi won wa e i klam kynthup ya u P.K. Boro, u Habahun Dkhar, MDC ka Sahsniang, u D. Tang Asst. Engineer Laskeiñ C&RD Block, u R. Shylla naka chnat Fishery wa kiwi de.
