U Montri ka sorkar jylla uwa man leh u Chairman ka Regional Committee hei wow pynbait pood yong ka West Khasi Hills District, u Renikton L Tongkhar da ong u wa ym jooh yoo u wa kiwi ki sorkar u ye ki wow leh rap bha heiyatoh wa i pynbait ya u pood wa ka Assam, wei da pynsñiaw u wa hun u heiyatoh wa kani ka sorkar wa katni yeiwa da leh ko.
Da ong u wa ka sorkar sñiawthooh ko yei sñiaw ki paidbah kiwa kwah wow em cha ka jylla, khamtam lada ymye wow kynthup ya ki kamwa kwah ki, tangwa neibynta i bha ka jylla emkaam ko leh wow em noh ya u pood wa pura wow kut noh i kajia. Da ong u wa kani ka kaam man ko kawa khia bha (Sensitive) wei iwa ktah leh ya i sñiaw yong kiwa chong chnong lada ka jylla ymye ko wow pynngait ya ka Assam wow e ya kitæ ki chnong.
Heipor wa yaklam ya kani ka kaam ha ka dorbar wa dang kut wot, i yaklam da man iwa chit bha heiwa da klam hadooh chi kynta duna ya ini i bynta heiwa neiliang u MLA ka KHNAM, u Adelbert Nongrum leh da pynsñiaw u yeiwa sñiaw u.
U Renikton da ong u wa ym kwah u wow kdaw ya uwon uwon, tangwa ki paidbah kiwa boon leh pynsñiaw ki yeiwa sñiaw ki, wei kiwa mihkhmat leh hapoh ka dorbar pynsñiaw ki yei mynsien wa khia hapoh ka dorbar.
Da ong u wa ka sorkar sñiawkhia ko wa ymye ko wow pynhun ya kitu kiwa da chah ktah na i pynbait pood wei kmen ko leh wa da ye wow pynkmen ya kiwa chong chnong kiwa hun ya i pynbait ya u pood.
