Jowai : Kam chibynta wow yarap ya ki khynnah yow man ki kiwa da pynkhreh yow lai skur, ka Women’s Welfare Organization yongka Seiñraij Jowai ynne ka 21 tarik da wai ko ya ka Play School ha yung krehkaam ka Seiñ ya kawa tip pyrtuid kam ka Newell Shallam Play School.
Da booh pyrtuid ya ka yow sah kynmoo ya u tynde u Newell Shallam heiwa da pynyieñ ya ka yung ka seiñ ha i thaw wa da e mynkna u chaka Seiñraij Jowai.
Ha ka yalang wa da pynman ha yung dorbar ha Seiñraij Jowai, ka kong Mumubai Lakiang, Senior Lecturer, DIET, Thadlaskeiń hei klam yong ka ong ko wa ha kani ka Play School daw chim 20 ngut ki khynnah ki wow pynlut por 2-3 kynta chi sngi hei emlang arngut kiwa sikai kiwa da dep yoh yei hikai heiwa kammon u sikai yaki khynnah kiwa dang hapoh 4 snem chwa u sdang ki u lai cha ki skur.
I daw wa emkaam u em kini ki Play School toh yow suk ki khynnah u sdang lai skur. Kiwa boon hi ki khynnah wa dep ya ka Play School ym jooh dam ki u pyndep yei lai skur (drop out) wei man ki kiwa smat u tip wow sñiawthooh (learn) nadooh na Class Nursery.
Da wan wai ya kani ka Play School da ka kong Wanchwa Challam, Director of Accounts & Treasuries. Da wai leh ha kani ka jooh ka sngi yaka kamra thymme ka Creche kawa da kyrriah na i kamra warim wa em ha kani hi ka jooh ka yung cha i kamra wa heh wa em leh wa iwi i Rkut (kamra chet ja).
Haka yalang wa pynman ha chwa u wai ya kani ka Play School da yoh yei klam na ka kongsan ka kong Wanchwa Challam, wa kiwi kiwa chah khut sñiawbha wa ya ki chaad ki rwai na ki khon ka seiñ kam na ka Chlem Hikai Tynre.
Discussion about this post