Ynne ka sngi u Deputy Chief Minister ka jylla uwa man leh u Montri ka chnat Transport, u Sniawbhalang Dhar kam u kongsan chirup wa u Sports Minister, u Wailadmiki Shylla kam u Symbood Kongsan da wai ki ya ka NG Motors kawa man ka thaw chna ya ki kari namo ka TATA Authorised Service Station kawa em ha Khliehtyrchi, ha u sarok Jowai Bypass.
Kani ka NG Motors toh ka thaw wa ye u chna ya waroh ki kari ka Company TATA kawa heh dooh ha Ri-loom Jaiñtia wei kani ka Station toh wa mantre u Nidamon Chullet uwa man leh u Managing Director yong ka.
U Manager ka Workshop, u P. Nath da khana u wa ha kani ka thaw da biang lut ki tiar katkam ka juk wa katni wei man ko kawa heh dooh ha thaaiñ North East. Da ong u wa ka TATA Motors toh kawa heh dooh ka Company ha ka ri kawa chna kari nadooh ki khian hadooh ki kari waheh.
Neiliang u Wailadmiki Shylla hawa e i klam da ong u wa kani ka sngi daw man ko ka wow sahkynmoo ha ki por wow wan wei da sñiawkmen u wow yoo wa wan kani ka Service Station ha kani ka chnong ka Jowai Constituency deiwa pynrap wa man iwa ñiaar wow em ki bru yong i wow ye ki u wow sdang ya kam kani ka thaw deiwa e khublei ya u Nidamon Chullet neibhah ka sorkar jylla pynchlur ko wow wai khih wai kreh ya kiwi.
Da khana u wa da sdang ya ka Meghalaya Investment Agency wow pynsuk ya ki bru khamtam deiwa yooluti wa neini sam chaphrang wow yoh kam kini ki karkhana.
Chooh chooh da ong u wa ha kani ka juk toh ka dooh khih dooh kreh donhi neibhah waroh yaknieh ki yei jooh bait i kreh.
Da ong u wa em chiboon ki karkhana khyndaw-bilat tangwa ym em won i ya ki Chemical Engineer kamtæ emkaam u man kiwa thooh ki laad ki luti wa rap phær hei puræ puthi.
Heijooh i por da sñiawkmen u wa nadooh wa man MLA u, da yoo wa mih ki karkhana wa ki Show Room wa boonjait iwa ye u yarap ya ki khynroo khyllood wow yoh kreh ki.
Neiliang u Sniawbhalang Dhar da yaroh u ya u Nidamon Chullet wa da ye u wow booh ya kat kani ka thaw ha Ri-loom Jaiñtia deiwa yooluti wa kani ka thaw u rah burom ko ym du ya ka Ri-loom Jaiñtia tangwa wot ka jylla leh.
Da ong u wa boonsien pyrkhat i wa chwa wow seiñ kreh da emkaam wow em kyrdan tangwa ynne da yoo wa ym emkaam yei kyrdan puræ deiwa kdaw wa heipor wa nachwa em ka thied Sumo wei kiwi wot leh ya thied wot deiwa pynbood.
Da ong u wa hawa em i mynsien yaleh, kattæ da man iwa jop bait deiwa pynkynmoo yei por wa sdang ya ka Dhar Construction heiwa hawa sdang boon kiwa klam kiwa tieñsar tangwa lada em i mynsien yaleh tæ da poi ki ha kani ka thong.
Chooh chooh da ong u wa ka Ri-loom Jaiñtia nachwa jooh yoo wa ya ki bru wa e wai næ dai paar ki tangwa katni da kylla ini heiwa da khih pyn da ki Pnar hi.
Da kyntu u leh ya ki tre kari wow phah ya ki kari ki cha ini i thaw khnang wow myntoi i em kani ka thaw wei wow suk ki leh neibhah ym emkaam de ya ki wow lai cha jngai.
Ha kani ka sngi da yoh leh i ngoohblai na u S. Chullet wa ki kyntien khublei na u Managing Director ka NG Motors, u Nidamon Chullet deiwa emlang ki Dolloi, ki MDC wa kiwi.
Discussion about this post