Ka MLA ka Sutnga-Saipung, ka Santa Mary Shylla ynne da wai paidbah ko ya ka Pyrtakuna Water Supply Scheme (WSS) kawa da chna hapoh ka Jal Jeevan Mission (JJM) deiwa emlang u Deputy Commissioner ka East Jaiñtia Hills District, u Shivansh Awasthi, ka Executive Engineer, PHE Division, Jowai, ka R. Kynjin, u BDO ka Lumshnong Block, u M. Kyndait, u SDO ka PHE Khliehriat, u M. Passah, u JE ka PHE Khliehriat, u D. Dkhar, u Waheh Chnong ka Pyrtakuna, u Loveyou Bareh, u Secretary Chnong, u Pillarson Shylla wa ki paaid ka Pyrtakuna.
Ka MLA hawa e yei klam da e khublei ko ya ka chnat PHE deilang kiwa chong chnong ka Pyrtakuna wa da mankaam kani ka kreh pynpoi umkor cha kawi pa kawi ka manyung hapoh ka Jal Jeevan Mission (JJM) katkam ka thong u Prime Minister Narendra Modi.
Da khut ko leh yei ya krehlang yow pynneh pynsah ya kani ka umkor kamjooh ka thaw taan um yow yoh myntoi da waroh.
U DC hawa e yei klam da ong u wa deiwa yoh da ka umkor wa khooid ha ka yung ka sem daw pynduna ko yei pynlut por wow lai tong lai kit um wei daw yoh leh yei chait i khiah manda taan um na ki tyllong um wa khooid.
Kani ka Pyrtakuna Water Supply Scheme (WSS) toh kawa da chna hei lut wa Rs.1.83 klur yow pynpoi umkor cha ki 107 tylli ki manyung wa em hapoh ka Pyrtakuna.
Discussion about this post