theme-sticky-logo-alt
theme-logo-alt

Da wai ya ka ‘Sewing Threads’ ka thaw e sikai soor ha Mihmyntdu

Advertisement ad1

Ynne ka sngi u MLA ka Jowai, u Wailadmiki Shylla chirup wa u MDC ka Jowai North, u Brightstar Chyrmang da wai paidbah ki ya ka thaw e sikai soor that ya kawa tip kam ka Sewing Threads- Facere and Tailoring Hub kawa em ha Lumpyrtuh, Mihmyntdu. 

“Kani ka thaw hikai ko ya ki khynnah ha i soor khnang wow ye ki u seiñ kreh wei daw ye wow pynbiang yeiwa emkaam sula kiwa dep soor chwa (Readymade Garments) ha yaaw ha haat,” da ong ka J. Pale kawa man kam ka In-charge yong kani ka thaw. 

Advertisement ad1

Da pyntip ko leh wa ya kani ka thaw da sdang i e sikai ha ka 11 Naichiphaw 2021 heiwa da e sikai la kamwa 80 ngut ki khynnah wei ki rukom e sikai ha kani ka thaw kynthup ki boonjait nadooh kiwa dang sdang soor hadooh ka Fashion Designing.

Kani ka Sewing Threads toh kawa da tipmit wei kyrchaan da ka District Commerce and Industries Centre, Jowai. 

Neiliang u Brightstar Chyrmang, hawa e yei klam da e khublei u ya kiwa sdang ya kani ka thaw e sikai ya ki khynnah neibhah i em kani ka thaw man ko kam i kyrkhu khamtam ha ini i juk wa duna i yoh kreh ki bru khamtam ki kreh sorkar. 

Da ong u wa boonsien heipor wa em ki bia, ym em kiwa soor ya ki sula bia ha Jowai wei hap lai cha Laban kamtæ kyrmen u wa deiwa em kani ka thaw e sikai ym emkaam de wow lai thied sula na baar ym du heipor bia tangwa wot heipor Chaad Sukra, Behdieñkhlam wa kiwi kiwi. 

Kam u kongsan, u Wailadmiki Shylla da ong u wa man iwa sñiawsuk wow yoo wa kani ka thaw e sikai dang heh ko kat dang lai i por. 

“Boonsien thooh ki bru ya ka luti kawa suk, deiwa lai chwa cha ki Montri wa ki MLA tangwa yaroh O ya ka J. Pale kawa da sdang ya kat kani ka thaw e sikai wa heh wow myntoi ki khynnah khynroo khyllood,” da ong u Wailadmiki. 

Da ong u wa palat 50% ha ka jylla toh ki khynroo, wei man iwa sñiawkhia ya ka sorkar heiwa ymhoi u ieh ya ki, katwa kamtæ kani ka sorkar da sdang ko ya ka Youth Policy heiwa da kdaw ki kammon jait ki yarap wa ye u e ya ki khynroo. Da pyntip u leh wa neini daw sdang ya ka Project wow e sikai ya ki khynnah katkam ka sap wei ka-it mynsien ki heiwa ka e sikai u man ko kawa mynkna. 

Heijooh i por da kyntu u ya ki khynnah wow pynduna ki yei por wa pynlut ki ha ki Mobile khnang wow pait ya ki Website ki chnat sorkar khnang wow yoh yutip wa bniah khamtam heiyatoh ya ki kreh sorkar. 

“Neiyi i daw wan ki baar jylla cheini? I daw toh wa em ki kreh heini ha jylla yong i, weileh ymye i mo wow kreh pyn da-i hi?” da kylli u Wailadmiki, deiwa kyntu ya waroh wow man ki kiwa minot. 

Ha kani ka sngi da saam leh ya ki Certificate cha ki khynnah wa da chah hikai ha kani ka thaw kiwa kynthup ya kiwa 3 bnai wa 6 bnai. 

Kiwi kiwa da klam ha kani ka sngi kynthup ki ya u Waheh Chnong ka Mihmyntdu, u Abul Phawa, u Manager ka DCIC, u A. Malniang katwa ya ki kyntien khublei da e da ka TL Pale.

Share this:
Previous

Super Division: Jop ka 7Wasa

Next

Khlaad noh u Tbn. NP Phawa