Kawa nyngkong dooh ha ka Integrated Smart Check Gate ha Meghalaya da wai ya ka da u DC ka North Garo Hills ha ka 31 tarik u Wisu deiwa emlang kiwi ki heh ka District kam u SP, u DMO, ADC wa kiwi de ha Depa Garat ha i bynta u NH-62.
Kani ka Smart Check Gate toh kawa pynemkaam da ki kor Computer, ka Internet yow chim yukheiñ ya kawon kawon ka Truck wa kit mooyong kamjooh kiwi ki mar pohkhyndaw wa lai lyngba yong ka.
Kani ka Smart Check Gate toh kawa em leh ya ki CCTV yow riñ dur ya ki kari wa lai naka katwa ka kor wa thaw khia waka Computer da chim ko yei Number wa ka jait Truck kamjooh da chim yukheiñ leh ya ki jait mar wa kit ki. Kawi won ka kor da Scan ko ya ki Challan yow pyntikna wym toh kiwa chna thok deiwa Scan leh ya u Bar Code yow pyntikna chooh chooh wa waroh ki kot ki sla kiwa biang wa paka.
Heipor wa leh yeini waroh da phah leh wut wut nadooh ki dur ki dar, ki kot ki sla wa ka yukheiñ lyngba u Satellite Link cha ka yung krehkaam u Chief Minister wa cha ki yong ka chnat DMR waka chnat Transport.
Ya ini da leh da ka sorkar Meghalaya yow pyndooh yei kit mooyong pyrchah ya ka aiñ kamjooh i kit palatpood ya u mooyong wa lai cha ka Assam deiwa pynkrehkaam da ki Smart Check Gate.
Ha North Garo Hills u mooyong wa mih na Nangalbibra, South Garo Hills da lai lyngba kani yow psiah cha Dainadubi, Assam.
Ya kam kani ka jooh ka Smart Check Gate leh daw booh ha kiwi ki bynta ka jylla ha ki thaw wa lai u mooyong cha Assam.
