Ka 26 tarik uni u bnai da man ko ka sngi wow sahkynmoo heiwa u Montri ka chnat Tourism, u Paul Lyngdoh da wan wai u ya ka Tuber Chohchrieh Khliehpynthor View Point namo ka thaw paitke ya ka Pynthor Myntdu hei emlang u MLA ka Khliehriat uwa man leh u Montri ha ka sorkar jylla, u Kyrmen Shylla.
Ha kani ka sngi da em ka yalang wa pynlai da u Ram Muruh heiwa da yoh i klam pdiang burom na u Lar Bang.
Ya kani ka thaw da chna lyngba ka Scheme MGNREGA ha i lut wa Rs. 20.33 lak heiwa da em i thaw paitke, ki satliang, ki sapdoi wa kiwi kiwi ki wow pynyoosuk ya ini i thaw.
U Dy. CEM ka JHADC uwa man leh u MDC ka thaaiñ, u Lasky Rymbai hawa e i klam da sñiawkmen u wow yoo yei yakrehlang ki khon ka chnong hei wow pynmiat ya ini i thaw deiwa kyntu ya waroh wow yada ya ka ramaw khnang wow tipmit ki paidbah ya kani ka thaw.
U Kyrmen Shylla hawa e i klam da kyrpaad u ya u Paul wow e katkam iwa da paan ha ka dorkhat wa da e ha oo wei da pynbna u leh wow e Rs. 5 lak wow chna luti kjat cha Kchaaid Pohmulooh wa em hajan ini i thaw.
Neiliang u Paul Lyngdoh kam u kongsan da ong u wa toh sakhiat wa ini i pynthor man ko kam ka Hotspot neibynta i kaam uiñke suwari wei da wandur ko leh kam ka Map ka India heiwa da kular u wow thooh laad wow pynmiat ya ini i thaw.
Katkam ka dorkhat wa da e ka chnong, da kular u wow chna noh ya u Zipline ha ini i thaw wei daw phah ya ki sahep wow wan sylli ki wei wow kheiñsap katwon u lut heiyatoh wa itæ.
Kiwi kiwa da klam kynthup ki ya u Kunebha Muruh, u Helping Phawa, President ka Seiñraij Tuber, u Dr. Tammiyaki Shylla, BDO ka Wapung Block, u Shivanash Awasthi, DC ka East Jaiñtia katwa ya ki kyntien khublei da e da u Yohime Shylla.
Ya kani ka sngi da pynphooh da i rwai wa i chaad.
Discussion about this post