Jowai : Ka yingkieñ lai kjat hajrong ka wah Mynngot wa em ha Chnongpdeng kawa da pyndep da tam chisnem ynne ka sngi da wan wai ya ka da u D.C. ka West Jaiñtia Hills u Arunkumar Kembhavi hei emlang ka kong Isawanda Laloo, SDO Amlarem, u ma G. Rani Assistant Director Border Area Development waki tre chnong.
Da kyntu u ma Rani ya ki tre chnong yow sumar ki ya kani ka yingkieñ kam kiwa mantre neibhah kani ka yingkieñ daw yarap bha ko ya ki tre chnong. Neilaing u ma B. Kharmon Border Area Development Officer, West Jaiñtia Hills da pyntip u wa da pynlut T. 46.76 lak ya kani ka yingkieñ, kamjooh deiwa em kani ka yingkieñ sam pynmiat chooh chooh ko ya ka chnong.
Ha kani ka sngi ka chnong da yoh ko leh T. 5 Lak na ka Border Area Development yow yarap u kyntu ya ki kaam uiñsawari næ Tourism ha ka chnong.
U DC kyrpaad u ya ki tre yow pynemkaam hok ki ya kani ka poisa neibhah oo sñiawshih u u yoo wa boon wa noh jhep kylleiñ kylleiñ khamtam cha jan ka yingkieñ iwa pynyoo wa ka chnong ym em chimkhia ko yow sumar ya kani ka thaw.
Da ong u leh wa hei yaklam u wa ki tre chnong wa im ja nei kaam Tourism uwi u bru ong u wa yoh u haddoh T. 3 hajar chi sngi hanlada kattæ leh ym em wa pyrkhat wa lada sdang ini i thaw u tngit ym slem de daw sdang dam ki bru u wan cha kani ka thaw.
Kamjooh leh da klam u yei slem u pyndep ya ki paiñkhana yong ki yung wa em ha chnong heiwa dang du 100 tylli donhi wa da dep hadien 6 bnai na ki 126 tylli heiwa ka poisa wa da dep e lut cha ka chnong.
U DC ong u wa neiliang ka chnong haap pynyoo ko ya ki kaam wa em sakhiat i thrang u kreh ya ka kaam tourism wei neilaing yong ka chnong haap sdang ko deiwa pynman ya ini i thaw wa khooid wa jngiar.
Kamjooh leh ha u bnai Naitung daw yoh ka chnong sa ki Solar Lamps tymbud luti ka wah yong ka chnong. Kamtæ neilaing ki bor district da ong ki wa ka chnong toh u chimkhia wa ym toh u chaniah du ha ka sorkar yow wanrah yri roi i paar ha ka chnong.
Discussion about this post