Amlarem : Ka Elaka Nongtalang kawa em ha thaaiñ yong ka Amlarem Sub-Division da yoh ko yaka yung krehkaam næ ka Office wa paka neibynta u Dolloi lyngba i yarap yong ka 13th Finance Commission yong ka JHADC kam chibynta wow pynsuk yaaki paaid kiwa em hapoh yong ka Elaka Nongtalang.
Da wai ya kani ka yungkreh haka 28 tarik haka yalang wa pyllai da u ma M. Lyngdoh uwa man leh kam u Lyngdoh yong ka Nongtalang hei emlang u MLA yong ka thaaiñ u ma Stephanson Mukhim uwa man leh kam u kongsan, u ma Holando Lamin kam u symbood kongsan uwa man leh u MDC ka War Central, u ma Het Pohthmi u MDC War West, ki Dolloi kiwa haap hapoh yong ka thaaiñ War-Jaiñtia, ki Waheh Chnong, ki rangbah deilang waki paidbah.
U symbood kongsan u ma Holando hei klam yong oo ong u katwon man i sñiawsarong wa hapoh yong ka thaaiñ War-Jaiñtia ym jooh em kitæ ki khajia yaknieh thaw kam cha kiwi ki Elaka kiwa em ha Ri-loom Jaiñtia da kyntu u leh wow pteiñ u pynneh yeini i yatylli yow neh i suk i saaiñ.
U ma Stephanson Mukhim da yaroh u yei synchaar yong kani ka Elaka neidaw wa wa pynneh pynsah ki yei riti dustur hadooh kini ki sngi kam hei pali Dolloi hapyrdi ka Nongbareh waka Nongtalang. Da sñaiwngooh u leh ya ka Raij Nongtalang wada e sñiawbha ya kani ka thaw cha ka Elaka neibynta wow chna ya kani ka yung krehkaam u Dolloi.
Ha kani ka sngi da yoh leh yei klam na kiwa boon ki waheh yong kani ka thaaiñ wei kamjooh leh yaki rwai na ki khon ka Nongtalang Mission.
Discussion about this post