Kam chibynta wow pynbiang ya ki luti syngkhieñ ha ki thaw khappood ka ri, ynne ka sngi u montri yada ri ka India, u Rajnath Singh da wai u ya ki 44 tylli ki yingkieñ wei da booh mooyurim u leh ya ka Nechiphu Tunnel ha Arunachal Pradesh.
Kini ki yiengkieñ daw yarap ki wow pynyabi ya ki chnong wa jngai wei da wai ya ki lyngba ka Video Conference hei emlang u Dr. Jitendra Singh, u Chief of Defence Staff, Gen. Bipin Rawat, u Chief of Army Staff, Gen. MM Naravane wa u Defence Secretary, Sh Ajay Kumar ha nongbah New Delhi wa kiwi kiwi.
Neiliang u Rajnath da ekhublei u ya ka Border Roads Organisation (BRO) wa da pyndep ki ya kini ki 44 tylli ki yingkieñ hapyrdi i em ka khlam COVID-19 wa i pynthut i pynawri Pakistan wa China.
Da ong u leh wa kini ki yingkieñ daw yarap bha ko ya ki paidbah ka ri kamjooh ki chipai ha kiwa boon rukom.
Da pynbna u leh wa neini daw yoh ki wakreh ka BRO ya ki sula wa kyrpang khamtam kiwa da mang kyrpang neibynta ki kreh ha ki loom wa jrong.
Ynne ka sngi da booh ya u mooyurim neibynta ka Nechiphu Tunnel ha u sarok cha Tawang, Arunachal Pradesh uwa jrong 450 mtr u wow lai lyngba ka Nechiphu Pass.
Neiliang u Lt Gen Harpal Singh, DG BRO, da ong u wa ki 44 tylli ki yingkieñ em kiwa jrong 30 mtr hadooh 484 mtr wei em ki ha J&K (10), Ladakh (08), Himachal Pradesh (02), Punjab (04), Uttarakhand (08), Arunachal Pradesh (08) wa Sikkim (04).
