Jowai: Ka World Mission kawa man ka kynhun næ ka seiñ Mission yong ki dkhot ka Balang Presbyterian wa haap hapoh ka KJP Assembly, kawa da lai luti la kamwa 10 snem hei yatoh waki kaam yalap, ki kaam wow lehbha haka imlang sahlang, ynne ka sngi leh chibynta ka thong i lai luti yong ka da ye ko wow wai yow mooyurim wow chna yaka yung ri khonswet wa pura ha chnong Nartiang West Jaiñtia Hills District wa tip kam ka “World Mission Children’s Home Girls, Nartiang”.
Ka thaw ri khonswet ha kani ka chnong da em ko nadooh u snem 2018 tangwa hei yung chongwai donhi, kamtæ hadien i lai luti da yoh ko i tipmi naka sorkar, da yoh ko u thied i thaw wa pura, wow pynwandur yei dur ka yung wa pura, kamtæ da chim ko ka laad wow wai syndon yow mooyurim wei i chna leh u sdang noh i kattu.
Da mang wow chna ya kani ka yung hei lut wa 1 klur 80 lak tyngka, iwa 4 mala wa kynthup ka Basement, Ground Floor, 1st Floor, 2nd Floor waka 3rd floor heithaw iwa heh kamwa 10,000 Sq.ft.
Ha uni u snem da mang u pyndep chwa ka kynroh i siang madan wei chwa wow kut u bnai Kmaichonglad (December) la kammon kammon ka mala wa hatre duh (Basement) toh u dep yaka khang wa ki khynnah u yoh ki u sah, wei i lut da mang T. 25 lak.
Hei yatoh wa kani ka project da yoh yarap haroh ki kamwa T. 3 lak na u montri ka sorkar jylla uwa man leh u MLA yong ka 1-Nartiang Constituency u Sñiawbhalang Dhar.
Kamwa man kattæ em 10 ngut ki khonswet wada ri ha kani ka thaw, wei ka thong hi hadien wa dep u chna waroh daw ye u pynpsiah hadooh 51 ngut ki khynnah waroh.
U Executive Secretary ka World Mission u J.R. Khongjee, hawa pynche hei yatoh i lai luti ka World Mission ong u wa kani ka Mission yakrehlang ko chirup chirup wa ki Balang, heipor wa seiñ yaka em du 13 ngut ki dkhot, katni won da em kamwa 650 ngut ha kylleiñ ka Ri-loom Khasi wa Jaiñtia wei 7 tylli ki Unit.
Hapoh kani ka Mission khana u wa em chiboon i angnood næ Project neibynta ka imlang sahlang wei ka Project wa rap heh toh i pynchna yung ya kiwa dooh wa duk neibhah kani toh ka project kawa pteiñg katwa dang yoh yaka Fund.
Da wan wow wai ya u mooyurim da u Rev. P. Hynñiewta, Sr. Administrative Secretary, KJP Assembly uwa man leh kam u kongsan, u symbood kongsan u Ransom Sutnga Executive Engineer (PWD) Building uwa man leh uwa pynwandur ya kani ka yung, hei emlang u Rev. J.L. Warlarpih, Adviser, kiwa kitkam ka Nartiang Unit, kiwa kitkaam Central Body Shillong, ki manbei, ki dkhot ka Balang Nartiang wa kiwi haka ialang wa pynlai da u Rev, R.S. Mawlong President.
Discussion about this post