Hadien i wai paidbah ya u mot sahnaam u khlawait na Tuber, u Woh Tep Kyndait ha u snem 2016 ha Head Quarter ka Raij ha chnong Tuber Kmai Chnong, East Jaiñtia Hills District, ynne ka sngi won ka Seiñraij Tuber da ye ko u wai sa ya u motdur wa chi rynyieñ namo u Statue yong oo uwa da chna harood u mot sahnam yong oo hi ha kani ka jooh ka thaw.
Ya uni u motdur yong u Woh Tep Kyndait da wan wow wai da u Symbood Montri Rangbah ka sorkar jylla, u Sniawbhalang Dhar chirup i emlang u Kyrmen Shylla, Montri sorkar uwa man leh u MLA ka thaaiñ, neitæ u Wailadmiki Shylla MLA ka Jowai, u Dy CEM ka JHADC, u Lasky Rymbai, u MDC ka Sohmynting Khliehtyrshi, u Lakhon Dkhar, u SP wa u DC ka East Jaiñtia Hills District, u Dolloi ka Elaka Jowai u Puramon Kynjin wa kiwi.
Katkam ka parom tbian wa da pynsñiaw da u Adviser ka Seiñraij Tuber, u H. Phawa uwa da ong, wa i chna ya u mot sahnaam kamjooh u motdur yong u Woh Tep Kyndait toh yow sahkynmoo pateiñ la pateiñ yaki kaam wa khroo wa da leh u yaka jaitbru Ri-loom Jaiñtia, itæ toh hajrong i pyrchah yong oo yei thmu u Syiem Jaiñtiapur u pynkylla yabor yaka niam ka rukom, ka jait ka kynja, ka riti dustur wa kiwi won ki jait ngait yong ki bru ri-loom ka Jaiñtia wa haap hapoh ka hima yong oo du neidaw wa oo chongkha u wa kiwi won ki jaitbru jait niam.
I pyrchah u Woh Tep Kyndait da poi chadooh u pood wow mih ka thma wa joor hapyrdi u Syiem Jaintiapur waka Nongsyntoin kawa da tip katni kam ka Tuber.
Kani ka thma da jia ko ha u snem 1669 heipor wa man Syiem Rangbah u Syiem Amratab Sing wa u Syiem Khynnah u Rapo Ram Singh.
Neiliang u kongsan, u Sñiawbhalang Dhar hawa e yei klam yaroh u yei ku ki paaid ka Raij Tuber neipor cheipor la heiyatoh wa i stat i tip, i ka akor burom. Ngait skem u leh wa ini da pynkmen i ya u Woh Tep Kyndait na lyndet wow yoh u yoo hajrong i ku i roi ki khon ki raiot yong oo.
“Neibhah i angnood wa kam kani em ko ha kiwa boon kiwa yahkhmat næ wot haki bei ki pa, wa iyi wym ye ki u leh heipor yong ki yooluti ki wa daw ye u pyndep won da ki pateiñ wa bood”, da ong u Sniawbhalang Dhar.
Hawa kyruiñ won u yei man kam kiwa mihkhmat paidbah, ong u han lym ye u pynyoh lut ya waroh i dawa u paidbah leh tangwa kam kiwa mihkhmat pyrchang bait ki u pynyoh yei emkaam la khajak næ boon. Wei kam kiwa mihkhmat lada leh iwa sih næ iwa bha katwon katwon leh daw em bait i pynbaad wei hap wow pdiang ya waroh ar.
Heiyatoh wa i emkaam u chna yow surok wow lai cha Khlooblai ka Raij Tuber kamwa da pynsñiaw da kiwa yahkhmat ka Raij, u Sniawbhalang da kular u wow thooh ki laad ki luti, katwa neibynta u pynbha pynyoosuk chooh chooh yaki soodong sookun ka thaw wa em u mot sahnaam wa u Statue u Woh Tep Kyndait, ong u wa emkaam u yachong pyrkhat chwa iyi wa toh u leh.
U Kyrmen Shylla won ong u kani ka sngi da man i sakhi yaki kyntien wa jooh ong “Im i pyrtuid sah i naam” neibhah lyngba i stat kiwa yahkhmat hanla u Woh Tep da khlaad u la 355 tylli ki snem leh tangwa ka naam ka burom yong oo u neh sah pateiñ ko.
U Wailadmiki Shylla won ong u kamwa uni toh u motdur wa nyngkong yong u Tep Kyndait, yooluti u wa lada chna sa cha kiwi won ki thaw leh i dur toh u man i jooh ym wow phær i dur na kawi ka thaw cha kawi won kamwa man yei dur u woh Kiang Nangbah.
Heijooh i por kyntu haroh u wow pynneh pynsah yaki riti dustur dei wow pynyoo wot hakhmat ka pyrthai.
Ha kani ka sngi da em leh i booh syntu wei e baam e dih ya u Woh Tep Kyndait, najrong ki chaad wapher wapher.
Discussion about this post