Ka yaw ya dai ya thied wa tip kam ka 1st International Mega Trade Fair ha Jowai da wai paidbah yaka ynne i janmiet ha Chutwakhu Indoor Sport Hall da ka E. Shylla, Secretary Executive Member JHADC, hei emlang u Dr. H.H. Mohrmen, Secretary SURE, u Eddistone Shylla waheh chnong warim ka Tympang Iawmusiang wa kiwi kiwi.
Ya kani ka Mega Trade Fair da wanrah daka Better Life SHG Iawmusiang chirup i krehlang waka Kaziranga Multipurpose Women Co-operative Society, wei ha kani ka yaw yadai yathied ki paidbah ye ki u yoh ya chiboon jait ki tiar pynemkaam ha yung, ki tiar wow booh pynyoosuk pynwandur hapoh yung, ki tiar kyndehke khynnah, ki that ki sula, najrong ki baam wa boonjait wa kiwi kiwi de wada wan chimbynta da ki kynhun naki jylla waphær.
Haka yalang tbian ha kani ka janmiet wa pynlai da u Raj Passah, Secretary Better Life SHG, ka Dolly Rani Das naka Kaziranga Multipurpose Women Co-operative Society da khana ko hajrong ka Society yong ki, katwa neiliang ka E. Shylla, u Dr. H.H. Mohrmen wa u Eddistone Shylla da e yaroh ki yei lai luti ka Better Life SHG wot hadooh u wanrah ya kani ka Trade Fair.
Heijooh i por pynehbok pyneh nasib ki yow hoi yaw wei u myntoilang nadooh kiwa dai kamjooh kiwa thied.
U Dr. H.H. Mohrmen yooluti u wa kani ka Trade Fair u yarap ko leh ya kiwa chimbynta u saam kylliang ki yei buit i stat khnang yow ye chooh chooh ki u ku chaphrang, neibhah kiwa chimbynta wan ki naki thaw ki jylla waphær waphær.
Yei kyntien e khublei da yoh na u Heirtami Sariang dkhot ka Better Life.
