Ka skur neibynta ki khynnah khian kiwa nadooh ar snem chiteiñ kawa tip kam ka ‘A Thousand Dreams Pre-School’ wa em ha Khliehriat East hadien ka yung krehkaam ka chnat Social Welfare ha u sarok wa lai cha ka yung krehkaam warim u DC ka East Jaiñtia Hills District, da wan wai yaka ynnin ka sngi da u MLA ka thaaiñ uwa man leh kam u Montri sorkar, u Kyrmen Shylla.
Kani ka Pre-School toh kawa pynkhreh ya ki khynnah chwa wow psiah ki cha ki skur wa pura yow booh ha ki yei thrang wei ka-it yei puræ puthi wei wow kwah ki u tip yeiwa thymme heijooh i por leh yow bien ki u lai skur.
Kani ka skur toh kawa bien leh u li thooh li booh ya ki khynnah kawa em da ka School Van wei i por man skur toh nadooh 9:00 waje i step hadooh 12:00 waje pyrdi sngi, neitæ em leh iwa nadooh 12:00 waje hadooh 3:00 waje i sngi waka 9:00 waje i step hadooh 3:00 waje i sngi iwa ye ki bei ki pa u jied da iwon i por u phah ki khon ki cha kani ka skur.
Kani ka skur toh kawa em leh wa i madan yalehke nadooh ki satliang, tinsapdoi, it-ot, ka Trampoline wei hapoh ka skur won da em ka thaw yow ya rwai ya chaad, ki tiar kyndehke, ki tiar tem, ki kot ki sla wa e hikai, ki kot yow ya dro, ka thaw wa e laad ya ki khynnah yow khana parom ki hakhmat kiwi wa kiwi kiwi de ki wow yarap ya ki khynnah u man ki kiwa chlur, kiwa skem hei rukom man.
Kiwi de ki thong toh yow pynpliah ya ki khynnah wow pynemkaam ya ki kti ki kjat deiwa pynchlur ya ki wow chna ya kiwa boon ki jait ki tiar wa da pynkhreh ha kani ka skur deiwa pait wa sumaar ki bru wa da pliah ha ini i kaam.
Kamwa man kattæ dang pdiang ya ki khynnah cha kani ka skur wei yow tip bniah ye phi wow Phone ha ini i Number-8376836453.
Discussion about this post