Da wai yaka Orchidarium wa nyngkong dooh hapoh ka ri ha Meghalaya

Shillong: Ka Orchidarium wa nyngkong dooh hapoh ka ri da wai yaka neibynta kiwa uiñke suwari ha 6th Mile, Upper Shillong. Kani ka thaw thung yaki syntu Orchid da em ko ha i thaw wa heh 6000 Square feet, wei da pait yaka da ka Institute of Bioresources and Sustainable Development (IBSD), ka chnat krehkaam ka Department of Biotechnology kawa em hapoh ka Ministry of Science and Technology wei da pyndep chna yaka du hapoh 3 bnai.

“Kani ka Orchidarium man ko kawa du kam ka hapoh ka ri kawa em leh ki kor wow pynman ya i chit i dait thah katkam wa emkaam ki syntu Orchid,” da ong u Prof. Dinabandhu Sahoo, Director IBSD hawa yaklam wa kiwa thoh khubor ha Shillong. Ka IBSD kreh ko wow pynclur i ki jait thung wa boon jait yow man ko leh kam ka laad kamai ya ki bru da pyntip u Prof. Sahoo.

Da ong u leh wa i thung syntu Orchid yow man ko kam ka kahyi pateiñ toh kawa yoh nong bha khamtam haka thaaiñ mihsngi kawa em hadooh 900 tylli ki jait Orchid wei na kini ka Meghalaya samen em ko 439 jait.

Chooh chooh da ong u wa boon na kini ki syntu toh kiwa ym tipmit wei ye ki u wiar jait neiwa khait ki bru ki na khloo yow pynriam yung tangwa ngait u wa deiwa em kani ka Orchidarium ki paidbah daw tip ki u sumaar ya ki wei daw e khih ki ya kitu wa kwah wow embynta ha kani ka kaam nadooh ki warep wa ya kiwa ym em khih em khan.

Related posts

Khlaad noh ka Kong Nitaboris Biam

November 9, 2024

Sñiawkhia u Andrew Shullai ya i tlot i rukom pynmih poisa ka JHADC

November 7, 2024

Da pyntip leh u Prof. Sahoo wa hapoh pyrthai ka yaw ya dai ya thied syntu chong dor ko 80 Billion USD wei ka ri India em ko i bhah wa du 0.6% na ini waroh. Hapoh ka ri won haka poisa India ka yaw dai wei wow thied syntu da poi ko T. 130 Billion ha u snem 2017 wei da yooluti wa daw ku ko cha ka T. 394 Billion ha u snem 2023 kawa man wa ku da 20% nadooh 2018-2023.

Hawa kylli won kammon u ye ki bru u yoh khih na kani ka kaam wow thung Orchid, da pyntip u wa ka IBSD da dep e sikai ko ya 1000 ngut ki bru naka thaaiñ mihsngi ha ka thaw e sikai wa em ha Manipur.

Da pyntip u leh wa da dep wai yaka Orchid Production Unit ha Tura deiwa yarap ka sorkar jylla wei daw wai chooh sa 20 tylli kam kini ki Production Unit ha waroh kawi ka jylla Meghalaya.

Hapoh kani ka Orchidarium da em leh ki Orchid kiwa naka ri Thailand, Singapore, Japan, England wa kiwi kiwi ki ri.