Shillong: Hadien wa mih i pynbaad neiliang ka Federation of Khasi Jaintia and Garo People (FKJGP) wa ka Ganesh Das Hospital da kyntait ko wow sumaar ya kawi ka manbei wa thmu wow lai kha khon ha ka step ka 2 tarik uni u bnai neidaw wym biang ki tiar wow pooid, u montri ka chait ka khiah ka sorkar jylla da pynsñiaw u yei sñiawphylla hajrong ini deiwa ong leh wa man ko ka sñiawthooh bakla hapyrdi kawa wan chah sumaar wa ka Doctor.
Hadien wa yoh u yaka yutip, neiliang u Hek da phone u wut wut yow yoh yei pynche na ki bor wa pynlai ka Ganesh Das wei hadien wa yaklam u waka Medical Superintendent da ong wa ini toh du i wym sñiawthooh yumut hapyrdi ka Doctor wa kawa wan phah sumaar wow kha khon.
“Wow ong wym em ki tiar man ko kawa ym ye u man, nga da yaklam O waka Medical Superintendent, ka Dr. Swett, kawa da pyntip wa ym em kam i tæ wei man ko du i sñiawthooh bakla,” da ong u Hek.
U montri da ong u wa ka Ganesh Das Hospital toh ka thaw sumaar neibynta waroh ha ka jylla, heiwa waroh ki bru na kylleiñ khamtam na ki thaw nongkyndong na ki District waphær waphær wan ki wow chah sumaar. “Kiwi kiwi ki thaw sumaar ha kiwi kiwi won ki District ym em da biang ki kam ka Ganesh Das kawa biang dooh tam.”
“Hadooh katni ym pu em kam kani ka ujor, nga sñiawphylla O wow yoo khubor tangwa hawa chem won yei sakhiat wa da pynche da ki bor pynlai daka Ganesh Das Hospital da man ko wa ym em kam kattæ kawa ye u man du ka sñiawthooh bakla,” da ong u montri.
Kam wow pynkynmoo wa ka FKJGP da pynbaad ko wa ka Hospital da kyntait ko wow pdiang ya ka manbei kawa mut wow kha khon hapyrdi i sooh khon wa emkaam wow pynkha dei pooid, tangwa neidaw wym biang tiar pooid kamtæ da phah noh cha kiwi ki Hospital yow lait na i ma.
Discussion about this post