U Symbood Montri Rangbah ka jylla, u Prestone Tynsong ynne da wai u yaka yung krehkaam u Executive Engineer, PWD (Roads), Mawphlang Division kawa em ha Mawphlang.
U Prestone Tynsong hawa e yei klam da ong u wa deiwa wai ya kani ka Mawphlang Division da man ko wow pynmankaam yei angnood ki paidbah ka thaaiñ. Da ong u wa kani ka Division ym toh i pynku kyrdan yaka Sub-Division wa katni tangwa da chna yaka Division wa thymme wei ka Sub-Division daw pteiñ ko u krehkaam.
Da khana u wa ka sorkar da pyrkhat sani bha ko wei da rai ko wow chna thymme soo tylli ki PWD Divisions wa thymme ha Dadenggre, Kharkutta, Mawshynrut wa Mawphlang dei thmu wow pnyaar ya ki chnat sorkar yow pynjan yei kreh ka sorkar cha ki paidbah.
U Prestone da pyntip u wa ka PWD Shillong South Division daw rah noh cha Pynursla yow pynkyllooid ya ka sor Shillong, da khana u leh wa i kyrriah ya ki yung krehkaam sorkar cha kiwi ki bynta ka jylla leh dang lai i chakhmat.
Ha kani ka sngi da emlang leh u Eugeneson Lyngdoh, MLA, u Samlin Malngiang, MLA, u H. Lamphrang Blah, MDC, u Sherbor Mawlong, MDC, u K K Mawa, Chief Engineer, PWD (Roads), u S Kyndiah, Superintending Engineer, PWD (Roads), Eastern Circle, u W Rilang Lyngdoh, Executive Engineer, PWD (Roads), Shillong South Division, ki dkhot ka Hima Mawphlang wa kiw de.
