Ynne ka sngi da wai ya ka Ramakrishna Mission Charitable Dispensary wa pura ha Jalaphet Bri-Sumer, East Jaintia Hills heiwa da wan wow sakhi ya ini da kiwa boon wa lang nadooh kiwa chong chnong wa ki waheh wa sian yong ki chnong kiwa najan.
Neiliang ki waheh yong ki chnong da e khublei kyrpang ki ya u Secretary ka Ramakrishna Mission Sohra wa ya u Manbha Lyngdoh wa man leh uwa pait yei miat i bha yong ka Mission waroh kawi.
Da yoh leh yei klam na u kongsan uwa man leh kam u MDC yong kani ka thaaiñ, u Krison Langstang uwa da e khublei yei wan ka Mission ha kani ka chnong deiwa pynsñiaw yei emkaam i chait i khiah hapoh ka thaaiñ.
Neiliang u Manbha Lyngdoh uwa man leh kam uwi na kiwa pait yaka Mission hapoh Ri-loom Jaiñtia, da ong u wa i wan ka Mission toh neibynta u chakri ya ki bru, khamtam ya ki lymboit lymbiang, ki sem chiliang ki kup chiliang.
Da khana u leh wa kani ka Dispensary toh kawa e chakri dei mynkna ya waroh heiyatoh wa ki dawai wa ka bai Doctor.
Neiliang u waheh chnong yong ka Jalaphet Bri Sumer da khut da wer u kamjooh ya waroh ki chnong ki thaw wow wan chim dawai na kani ka Dispensary.
Kani ka Dispensary toh kawa wai Monday hadooh Saturday ha ki por 9:00 waje i step hadooh 1:00 waje i sngi.
