Ka Dorbar Chnong Pamrakmai, East Jaiñtia Hills District ryngkat waka Village Employment Council (VEC) ynne ka sngi da wai paidbah ki ya u sarok CC Road wa jrong 550M waka luti laikjat namo Footpath wa jrong 680M hapoh ka chnong wa da kreh na ka Scheme chispah sngi.
Ya kini ki kreh da wan wai paidbah da u Deputy Commissioner ka East Jaiñtia Hills District, u Abhilash Baranwal, kam u kongsan wa u Dr. Tammiyaki Shylla BDO, Wapung C&RD BLOCK kam u symbood kongsan deiwa emlang kiwa kitkaam chnong, ki SHG, ki khynnah skur wa ki paidbah wa chong chnong ka chnong Pamrakmai hi waroh kawi.
Ha kani ka sngi da pynlai ya ka yalang da u Waheh Chnong u Iaikiewbha Rymbai, ki kyntien pdiangburom da yoh na u Chairman Chnong u Jamris Siangshai wa i chaad pdiangburom na ka Iahunlang VO.
Da pynchongkun chooh chooh ya kani ka yalang deiwa pynkup burom ya ki tre thaw wa da e sñiawbha wow chna ya ka sarok wa ka luti laikjat, ya kiwa kitkaam wa nyngkong ka VEC u Archi Siangshai kam u Chairman wa u Phringstar M Pariat kam u Secretary wa nyngkong.
Ha kani ka sngi da e leh ya ka dorkhat (Memorandum) cha u DC wow yoh ya ka Dorbar Hall wa thymme ya ka chnong heiwa da kular u wow chimkhia yeini.
U DC hawa e yei klam da pynsñiaw u yei sñiawngooh ya kiwa yahkhmat ka chnong wa da kreh chitom ki wow pynkrehkaam hok wei da kular u wow yarap ya iwon iwon iwa chem chitom ki deiwa kyntu lang leh ya u BDO wow ya krehlang wa ka chnong.
Neiliang u BDO da kyntu kynpham u ya kiwa chong chnong wow ya krehlang wa kiwa yahkhmat chnong wei da kular u wa neiliang ka yung krehkaam yong oo wow yarap wow e chooh chooh ya ki Scheme neibynta ka roi ka paar.
