Kam chibynta wow yarap ya kiwa chong chnong wow yoh symbe dakha khamtam kiwa chong chnong ka Lahalein, East Jaiñtia Hills District, ynne da wai ya kawa nyngkong dooh ka Fish Eco Hatchery wa da chna da ka VEC ka chnong Lahalein hi hapoh ka MGNREGA deilang waka Basin Development Unit (BDU), East Jaiñtia Hills District wei da wan wai ya kani da ka MLA ka Sutnga-Saipung, ka Santa Mary Shylla.
Ka MLA hawa e yei klam da pynsñiaw ko yei sñiawngooh ya ka yung krehkaam u Superintendent of Fisheries, East Jaiñtia Hills District wa ki dkhot ka Lahalein VEC yei ya krehlang ki yow ye u pyndep pynchna ya kani kawa nyngkong dooh ka Fish Eco Hatchery.
Da e khublei ko leh ya u L. Tynsong uwa man kam uwa psan dakha uwa da e mynsien leh ya kiwa boon kiwi wow bood ya ki dak kjat u yow man ka Lahalein kam ka thaw pynmih symbe dakha wa heh ka District.
U Deputy Commissioner ka East Jaiñtia Hills District, u A. Baranwal da ong u wa kani ka Fish Eco Hatchery toh kawa ye leh wow e kreh ya ki khynroo khyllood ka District.
Kani da man ko leh kawa nyngkong dooh ka Fish Eco Hatchery kawa da chna hapoh ka MGNREGA Scheme hapoh ka ri deiwa thmu u pynmih hadooh 15 Million tylli ki symbe dakha.
Discussion about this post