Ka Montri ka chnat i chait i khiah, ka Dr. Mazel Ampareen Lyngdoh ynnin da wai ko yaka Urban Health and Wellness Centre wa em ha Mawlai Mawdatbaki, Shillong deiwa emlang u MLA ka Mawlai Constituency, u Brightstarwell Marbaniang, ka Deputy Commissioner ka East Khasi Hills District, ka R.M. Kurbah, u MDC ka Mawlai, u Teiborlang Pathaw wa ki sahep ka DHS.
Ka Dr. Mazel Ampareen Lyngdoh da ong ko wa i wai ya kani ka Health Centre daw pyntikna ko wa kiwa chong chnong kani ka thaaiñ daw suk ki wow yoh yei sumaar. Da ban joor ko leh yei emkaam pynsuk ya ki paidbah wa i pynkrehkaam yaka Telemedicine kawa daw yarap wow tip bniah yei kjut ki chitom wei wow yow ki leh yei yarap wa emkaam.
Ka Montri da pynchlur ko leh ya ki paidbah wow chim kabu ya kani ka Health Centre deiwa wan yachem ya ki Doctor dei langær kamjooh lada emkaam yei yasyllok khamtam kitu kiwa da chah kdoh chah khoom hei jiat dih wa boon jait.
Neiliang ka DC da e khublei ko ya kiwa kreh ka chnat kiwa da ye u pynchna ya kani ka thaw sumaar wa thymme wei ya ki paidbah leh wow wan ki chakhmat yow yoh ki yeiwa emkaam ki.
Kani ka Urban Health and Wellness Centre daw chakri ko neibynta ki 8 tylli ki dong deiwa kyrpang ya ki manbei wa punkhon wei daw em leh ka Cancer Screening, i e tika, i leh ka Tele Consultation wa kiwi kiwi.
Da ya emlang ha kani ka sngi wa u waheh chnong, kiwa chong chnong, ki ASHA, ki Doctor, ki Nurse wa kiwa chong chnong.
Discussion about this post